بھوپال سیٹ سے سادھوی پرگیہ سنگھ کو امیدوار بنائے جانے کے تعلق سے جی وی ایل نرسمہا راؤ پریس کانفرنس کر رہے تھے جب اچانک ہی ہال میں موجود ایک شخص نے جوتا پھینک کر انھیں مارا۔
دہلی واقع بی جے پی ہیڈکوارٹر میں جب پارٹی کے سینئر لیڈر اور ترجمان جی وی ایل نرسمہا راؤ اور بھوپیندر یادو پریس کانفرنس کر رہے تھے تو اچانک ایک جوتا جی وی ایل نرسمہا راؤ کو لگا جسے دیکھ کر وہاں موجود سبھی لوگ حیران و ششدر رہ گئے۔ جوتا پھینکنے والے کو وہاں موجود سیکورٹی اہلکاروں نے فوراً پکڑ کر ہال سے باہر نکالا اور پولس کے حوالے کر دیا۔
#WATCH Delhi: Shoe hurled at BJP MP GVL Narasimha Rao during a press conference at BJP HQs .More details awaited pic.twitter.com/7WKBWbGL3r
— ANI (@ANI) April 18, 2019
میڈیا ذرائع کے مطابق بھوپال سیٹ سے سادھوی پرگیہ سنگھ کو امیدوار بنائے جانے کے تعلق سے جی وی ایل نرسمہا راؤ پریس کانفرنس کر رہے تھے جب اچانک ہی ہال میں موجود ایک شخص نے جوتا پھینک کر مارا۔ واقعہ کے بعد ہال میں افرا تفری مچ گئی۔ اس درمیان سیکورٹی اہلکاروں نے اسے اپنی گرفت میں لے لیا۔ پھر جوتا پھینکنے والے نے اپنی جیب سے ایک وزیٹنگ کارڈ نکال کر اچھال دیا جس پر لکھا تھا ’شکتی بھارگو‘۔
بتایا جاتا ہے کہ شکتی بھارگو کانپور کے رہنے والے ہیں اور وہ ہال میں سب سے آگے بیٹھے تھے۔ صحافیوں نے جب ان سے جوتا پھینکنے اور ان کی ناراضگی کا سبب پوچھا تو انھوں نے کچھ نہیں کہا۔ چونکہ سیکورٹی اہلکار انھیں پکڑ کر فوراً باہر لے گئے اس لیے صحافیوں کو بھی کچھ پوچھنے کا زیادہ موقع میسر نہیں ہو سکا۔ اس وقت شکتی بھارگو آئی پی اسٹیٹ پولس اسٹیشن میں ہیں اور پولس ان سے پوچھ تاچھ کر رہی ہے۔
