کیجریوال نے ٹوئٹ کرتے ہوئے اس تعلق سے لکھا ہے کہ ”دہلی پولس نے مکھرجی نگر میں بربریت کا مظاہرہ کیا اور قابل تنقید کارروائی کی ہے۔ ہم اس پورے معاملے کی غیر جانبدارانہ جانچ کرنے اور قصورواروں کے خلاف سخت کارروائی کا مطالبہ کرتے ہیں
نئی دہلی (ایم این این )
دہلی کے مکھرجی نگر تھانہ کے باہر اتوار کی شام آٹو ڈرائیور اور پولس کے درمیان زبردست تصادم دیکھنے کو ملا۔ اس تصادم میں پولس اہلکاروں نے آٹو ڈرائیور کی بے رحمی سے پٹائی کی۔ اس پورے معاملے کا ویڈیو سوشل میڈیا پر وائرل ہو گیا ہے۔ ویڈیو میں صاف نظر آرہا ہے کہ سکھ طبقہ سے تعلق رکھنے والے آٹو ڈرائیور اور پولس کے درمیان کسی بات کو لے کر کہا سنی ہوتی ہے، جس کے بعد پولس کی ٹیم اس شخص کو لات، گھونسوں اور ڈنڈوں سے پیٹنا شروع کر دیتی ہے۔ اس معاملے میں فوری کارروائی کرتے ہوئے علاقے کے ڈی سی پی نے اے ایس آئی سنجے ملک، دیویندر اور کانسٹیبل پشپیندر سمیت تین پولس اہلکاروں کو معطل کر دیا ہے۔
https://www.youtube.com/watch?v=Vd1sze-oG_w
خبروں کے مطابق مکھرجی نگر تھانہ کے باہر ایک آٹو ڈرائیور کی گاڑی تھانہ کے باہر کھڑی پولس کی گاڑی سے ٹکرا گئی جس کے بعد ایک پولس والے نے اس کے لیے اس ڈرائیور کو متنبہ کیا۔ اس پر ڈرائیور اپنی تلوار (کرپان) نکال کر پولس والے کو دھمکانے لگا۔ اس حرکت سے ناراض پولس والا تھانہ کے اندر گیا اور پوری ٹیم کے ساتھ باہر آ گیا۔ باہر آ کر پولس کی ٹیم نے اس ڈرائیور کی بے رحمی سے پٹائی کر دی۔ حالانکہ آٹو ڈرائیور نے بھی پولس کے لوگوں پر تلوار سے حملہ کیا۔ موقع پر موجود لوگوں نے اس واقعہ کا ویڈیو بنا لیا جو کہ سوشل میڈیا پر وائرل ہو گیا ہے۔
دہلی پولس کے ذریعہ آٹو ڈرائیور کی پٹائی کے واقعہ کی دہلی کے وزیر اعلیٰ اروند کیجریوال نے پرزور الفاظ میں مذمت کی ہے۔ انھوں نے کہا ہے کہ اس پورے معاملے کی جانچ کی جانی چاہیے۔ کیجریوال نے ٹوئٹ کرتے ہوئے اس تعلق سے لکھا ہے کہ ”دہلی پولس نے مکھرجی نگر میں بربریت کا مظاہرہ کیا اور قابل تنقید کارروائی کی ہے۔ ہم اس پورے معاملے کی غیر جانبدارانہ جانچ کرنے اور قصورواروں کے خلاف سخت کارروائی کا مطالبہ کرتے ہیں۔“
ہنگامے کی خبر پر گرودوارہ پربندھک کمیٹی کے صدر اور اکالی دل کے قومی ترجمان منجندر سنگھ سرسا بھی موقع پر پہنچے اور ڈرائیور کی پٹائی اور پَگ کی بے عزتی کے سبب پولس اہلکاروں پر قتل کی کوشش کا مقدمہ درج کرنے کا مطالبہ کیا۔ اس واقعہ کے تعلق سے انھوں نے خبر رساں ایجنسی اے این آئی کو اپنا بیان بھی دیا جس کا ویڈیو انھوں نے اپنے ٹوئٹر ہینڈل پر پوسٹ کیا ہے۔ ٹوئٹ میں انھوں نے لکھا ہے کہ ”کون سا قانون پولس کو یہ حق دیتا ہے کہ وہ کسی بھی بے گناہ انسان پر بغیر اس کی بات سنیں لاٹھی سے پٹائی کرے؟ ٹیمپو ڈرائیور نے کرپان اپنے دفاع میں نکالی تھی، پولس اگر غنڈوں کی طرح حرکتیں کرے گی تو عام لوگ کتنی دیر تک خاموش رہیں گے!!!“
Delhi Police brutality in Mukherjee Nagar is highly condemnanble and unjustified.
I demand an impartial probe into the whole incident & strict action against the guilty.
Protectors of citizens can't be allowed to turn into uncontrolled violent mobsters.— Arvind Kejriwal (@ArvindKejriwal) June 17, 2019
سِرسا نے اپنے ٹوئٹ میں سکھ آٹو ڈرائیور کے 16 سالہ بیٹے پر پولس کے مظالم کا بھی تذکرہ کیا ہے۔ انھوں نے لکھا ہے کہ ”اس 16 سال کے لڑکے کا تو کوئی قصور ہی نہیں تھا، وہ تو اپنے والد کا بچاو کر رہا تھا لیکن پولس نے جس طرح سے اسے پیٹا وہ بربریت ہے اور ہم اس بربریت کو برداشت نہیں کریں گے۔ میں قصوروار پولس اہلکاروں کو ملازمت سے نکلوا کر ہی دم لوں گا اور کل اس انصاف کی لڑائی کے لیے ہم دہلی بند رکھیں گے۔“
ایک دیگر ٹوئٹ میں راجوری گارڈن سے رکن اسمبلی اور اکالی دل کے قومی ترجمان منجندر سنگھ سرسا نے لکھا ہے کہ ”کچھ لوگ دہلی پولس کے ذریعہ ایک بزرگ سکھ ڈرائیور اور اس کے نابالغ بچے کی مار پیٹ کو جائز ٹھہرا رہے ہیں۔ میں پوچھنا چاہتا ہوں ان سے- وردی پہننے والوں کا سارا زور زبر بے گناہوں پر ہی کیوں؟ کبھی کسی ریپسٹ تک کو ایسے نہیں پیٹا گیا جیسے کل اس بے قصور بچے کو پولس نے پیٹا۔“
آپ رکن اسمبلی ایڈووکیٹ سومناتھ بھارتی نے بھی پولس کے ذریعہ سکھ آٹو ڈرائیور کی بے رحمانہ پٹائی کو غیر قانون ٹھہرایا ہے۔ انھوں نے اپنے ایک ٹوئٹ میں لکھا ہے کہ ”کچھ لوگ کہہ رہے ہیں کہ پہلے سکھ شخص نے پولس کو دھمکایا اور پھر پولس نے اپنا رد عمل دیا۔ لیکن اس طرح کا رد عمل؟؟؟“ وہ مزید لکھتے ہیں کہ ”پولس کو اپنی طاقت کا اس قدر استعمال کرنے کا حق حاصل نہیں ہے اور وہ جب سکھ شخص کو زد و کوب کر رہے تھے تو ان کی پگڑی کا خیال رکھنا چاہیے تھا۔“
