آبادی کنٹرول قانون نہیں بنا تو ملک میں خانہ جنگی جیسے حالات پیدا ہوسکتے ہیں: گری راج سنگھ

گری راج سنگھ نے خطاب کرتے ہوئے کہا کہ آبادی کا بڑھنا ایک دھماکہ کی طرح ہے اور تکنیکی طورپر خواہ ہماری آبادی 130 کروڑ ہے لیکن حقیقت یہ ہے کہ یہ 150 کروڑ سے زیادہ ہے

نئی دہلی: مرکزی وزیر گری راج سنگھ نے کہاکہ ملک میں آبادی کنٹرول قانون نہیں بنا تو خانہ جنگی جیسے حالات ہوسکتے ہیں۔ آج پوپیولیشن سولیوشن فاونڈیشن کی بڑی تعداد میں خواتین کارکنوں نے آبادی کنٹرول قانون کی مانگ پر انڈیا گیٹ سے جنتر منتر تک پیدل مارچ نکالا اور گری راج سنگھ نے اس میں حصہ لینے والوں سے خطاب کرتے ہوئے کہا کہ آبادی کا بڑھنا ایک دھماکہ کی طرح ہے اور تکنیکی طورپر خواہ ہماری آبادی 130 کروڑ ہے لیکن حقیقت یہ ہے کہ یہ 150 کروڑ سے زیادہ ہے۔
گری راج نے کہاکہ جب تک آبادی کنٹرول قانون نہیں بنے گا تب تمام سہولیات کے لئے لوگوں کو ترسنا پڑے گا اور نہ ہی نوجوانوں کے لئے روزگار کے موقع پیدا ہوں گے۔ ملک کی بڑھتی آبادی تشویش کا موضوع ہے۔
پوپیولیشن سولیوشن فاؤنڈیشن کے صدر انل چودھری نے کہاکہ آبادی کے بڑھنے کی وجہ سے ملک میں غریبی، ناخواندگی، بے روزگاری وغیرہ مسائل بڑھ رہے ہیں۔ چودھری نے کہاکہ ہمارا فاؤنڈیشن تمام شہریوں کے لئے زیادہ سے زیادہ دو بچوں کا قانون نافذ کرنے کی مانگ کررہا ہے، اس سلسلہ میں 9 اگست 2018 کو ہندستان کے صدر رامناتھ کووند کو اس قانون کی حمایت میں 125 اراکین پارلیمان کے دستخط کے ادارے کا ایک خط سونپا گیا تھا۔
اس پیدل یاترا میں خواتین، جوان لڑکے اور کچھ بچے بھی شامل تھے اور آٹھ برس کا شیوم بھی اس بھیڑ کا حصہ تھا۔ آج وہ اسکول نہیں گیا اور جب اس سے پوچھا گیا کہ وہ یہاں کیوں آیا ہے تو اس نے نہایت معصومیت سے کہا کہ مجھ سے ممی نے کہا کہ آج میلہ دیکھنے چلتے ہیں اور میں میلہ دیکھنے آیا ہوں۔
پروگرام میں آئے لوگوں نے کہا کہ ملک میں آبادی کنٹرول کی مانگ پربیداری لائی جارہی ہے اور جو بھی سیاسی جماعت اس کی مخالفت کرے گی لوگ اس کے خلاف ہوجائیں گے۔