نئی دہلی: کانگریس کے سابق صدر راہل گاندھی نے منگل کو اپوزیشن کے اراکین کی معطلی واپس لینے کے لیے معافی مانگنے کی حکومت کی شرط پر جوابی حملہ کرتے ہوئے کہا کہ اسے ایوان کو بتانا چاہیے کہ عوام سے جڑے مسائل کو اٹھانا کیاغلط ہے اور اس کے لیے کیا معافی مانگنی چاہیے۔ راہل گاندھی نے اس پر ٹوئٹ کرتے ہوئے جوابی حملہ کرتے ہوئے سوال کیا ”کس بات کی معافی؟ پارلیمنٹ میں عوام کی بات اٹھانے کی؟ بالکل نہیں!
راجیہ سبھا میں قائد حزب اختلاف ملکارجن کھرگے نے آج جب ارکان کی معطلی واپس لینے کی بات کی تو نائب صدر وینکیا نائیڈو نے اس سلسلے میں کہا کہ جب تک اپوزیشن کے ارکان معافی نہیں مانگ لیتے ان کی معطلی واپس نہیں لی جاسکتی۔
راجیہ سبھا میں حزب اختلاف کے لیڈر ملکارجن کھرگے نے پارلیمنٹ ہاؤس کے احاطے میں اپوزیشن کے دھرنے کے دوران نامہ نگاروں سے کہا کہ اپوزیشن کے ارکان کی معطلی پوری طرح سے غیر جمہوری ہے اور یہ جمہوریت کو مارنے اور اپوزیشن کو کچلنے کی سازش ہے۔ اپوزیشن جماعتوں کے اتحاد کا دعویٰ کرتے ہوئے انہوں نے کہا کہ ہم سب ایک ہیں اور ایک آواز ہوکر حکومت کے اس فعل کی مذمت کرتے ہیں۔
