پی ایم مودی کی فیروز پور ریلی خراب موسم اور کسانوں کے سخت احتجاج کی وجہ سے ہوا رد

تقریباً دو سال بعد انتخابی موسم میں پنجاب کے دورے پر گئے وزیر اعظم نریندر مودی کو سرحدی ریاست میں موسم اور کسانوں کا سامنا کرنا پڑا۔ نتیجتاً فیروزپور میں ہونے والی ان کی ریلی کو رد کر دیا گیا۔ وزارت داخلہ نے ایک بیان میں کہا ہے کہ ”آج صبح وزیر اعظم کا طیارہ بھٹنڈا میں لینڈ ہوا جہاں سے وزیر اعظم کو ہیلی کاپٹر کے ذریعہ حسینی والا واقع قومی شہید استھل جانا تھا۔ لیکن بارش اور موسم کی خرابی کے سبب ہیلی کاپٹر پرواز نہیں بھر سکا، کیونکہ وجیبلٹی کافی کم تھی۔”

وزارت داخلہ نے کہا کہ تقریباً 20 منٹ تک انتظار کے بعد طے کیا گیا کہ وزیر اعظم سڑک کے راستے شہید اسمارک جائیں گے۔ اس سفر میں تقریباً دو گھنٹے لگنے والے تھے۔ لیکن راستے میں کسانوں کے احتجاج کے سبب راستہ بند تھا۔ وزارت داخلہ کے مطابق وزیر اعظم کا قافلہ تقریباً 20-15 منٹ تک فلائی اوور پر پھنسا رہا، جس کے بعد انھیں واپس بھٹنڈا ائیرپورٹ لوٹنا پڑا۔ وزیر داخلہ نے اسے وزیر اعظم کی سیکورٹی میں چوک کہا ہے۔

وزارت داخلہ نے اس معاملے میں سخت تیور دکھائے ہیں اور پنجاب حکومت سے جواب طلب کیا ہے۔ وزارت کا کہنا ہے کہ وزیر اعظم کے دورے کی ساری جانکاری پنجاب حکومت کو بتا دی گئی تھی۔ منصوبہ کے مطابق حکومت کو لاجسٹکس، سیکورٹی اور کنٹیجنسی پلان تیار رکھنا تھا۔ اس کے لیے پنجاب حکومت کو اضافی سیکورٹی فورس تعینات کرنا تھا، جو کہ نہیں کیا گیا۔ وزارت داخلہ نے اس ‘چوک’ کے لیے جوابدہی طے کرنے کو کہا ہے۔