بی جے پی رکن پارلیمنٹ ورون گاندھی نے ایک بار پھر مرکز کی مودی حکومت کو تنقید کا نشانہ بنایا ہے۔ اس مرتبہ انھوں نے وزارت صحت کے ایک امدادی منصوبہ پر مرکزی حکومت کو نشانہ بنایا ہے اور کہا ہے کہ نایاب بیماریوں سے متاثرہ مریضوں کے لیے 50 لاکھ روپے کی امداد کی یقین دہانی کرائی گئی تھی، لیکن وزارت صحت کے اس منصوبہ سے اب تک کسی بھی مریض کو فائدہ نہیں ملا ہے۔
ورون گاندھی نے اس سلسلے میں ایک خط مرکزی وزیر صحت منسکھ منڈاویا کو لکھا ہے جس میں امدادی رقم کی فوری ادائیگی کو منظوری دینے کی گزارش کی گئی ہے۔ یہ خط انھوں نے آج اپنے ٹوئٹر ہینڈل سے شیئر بھی کیا ہے۔ خط کے ساتھ ٹوئٹ میں انھوں نے لکھا ہے ”گزشتہ سال حکومت نے نایاب بیماری کے لیے ہر مریض کو 50 لاکھ روپے کی مالی امداد کا یقین دلایا تھا۔ ابھی تک ایک بھی مریض کو اس منصوبہ کا فائدہ نہیں ملا ہے۔ علاج کے انتظار میں 10 بچوں کی موت ہو چکی ہے۔ میں وزیر صحت منسکھ منڈاویا سے گزارش کرتا ہوں کہ وہ اس سمت میں فوراً کام کریں۔”
Last year, the govt assured financial assistance of Rs 50 lakh to every rare disease patient.
So far, not a single patient has benefited from this scheme. 10 children have died waiting for treatment.
I request Shri @mansukhmandviya to act immediately by clearing these payments. pic.twitter.com/6IcpFuNft0
— Varun Gandhi (@varungandhi80) January 7, 2023
مرکزی وزیر صحت کو لکھے خط میں ورون گاندھی نے کہا ہے کہ نایاب بیماریوں سے متاثر مریضوں کی زندگی کو بچانے کے لیے 30 مارچ 2021 کو وزارت برائے صحت و خاندانی فلاح کی طرف سے نایاب بیماریوں کے لیے قومی پالیسی 2021 شروع کی گئی تھی۔ انھوں نے بتایا کہ مئی 2022 میں اس میں کی گئی ایک ترمیم کے مطابق نایاب بیماری کے مریضوں کے علاج کے لیے 50 لاکھ روپے کی مالی امداد کی یقین دہانی کرائی گئی تھی، لیکن اعلان کے کئی ماہ بعد بھی ایک مریض کا بھی اس منصوبہ سے علاج نہیں ہو سکا۔