پلامو : جھارکھنڈ کے ضلع کے پانکی میں دو فریقوں کے درمیان ہوئے پرتشدد تصادم کے بعد حالات پر قابو پالیا گیا ہے۔ بدھ کی دیر رات کچھ شرپسندوں کی جانب سے ایک مکان کو نقصان پہنچانے کی کوشش کی گئی، تاہم انتظامیہ نے جائے وقوع پر پہنچ کر معاملے پر قابو پالیا، فی الحال پولیس انتظامیہ پانکی کے واقعے پر نظر رکھی ہوئی ہے اور مسلسل نگرانی کر رہی ہے۔ پلاموں کے سابق ایس پی اور آئی پی ایس اندرجیت مہتھا کو حالات کو دیکھتے ہوئے پلامو میں تعینات کیا گیا ہے۔ دوسری طرف پلامو زون کے آئی جی راج کمار لکڑا، ڈی سی اے ڈوڈے، ایس پی چندن کمار سنہا اور کئی اعلیٰ افسران موقع پر کیمپ کر رہے ہیں۔پانکی کا پورا علاقہ چھاؤنی میں تبدیل ہو چکا ہے۔ اس کے ساتھ ہی پلامو میں انٹرنیٹ سروس مکمل طور پر بند کر دی گئی ہے۔ واقعے کے پیش نظر پلامو میں جمعرات کی دیر شام تک انٹرنیٹ سروس کو بند رکھنے کا حکم جاری کیا گیا ہے۔ پولیس ٹیم پورے علاقے پر نظر رکھے ہوئی ہے، مذہبی مقامات پر سیکورٹی بڑھا دی گئی ہے۔ موصولہ اطلاعات کے مطابق جمعرات کو پانکی میں امن کمیٹی کا اجلاس منعقد کیا گیا ہے۔ امن کمیٹی کے اجلاس میں تنازع اور دیگر نکات پر غور کیا جائے گا۔وہیں انتظامیہ کی جانب سے پلامو کے پانکی واقعے میں ہونے والے نقصان کا اندازہ لگایا جا رہا ہے۔ جن کی دکانیں اور گھر جلے ہیں ان سے نقصان کے بارے میں پوچھا جا رہا ہے۔ ساتھ ہی اس واقعے میں زخمی ہونے والے پولیس اہلکاروں کی حالت بھی نارمل ہے اور وہ اپنی ڈیوٹی پر واپس آگئے ہیں۔ پانکی کے علاقے میں ایک ہزار سے زائد پولیس اہلکار تعینات کیے گئے ہیں۔ تشدد کے پیش نظر پانکی کے علاقوں میں آنے جانے والے لوگوں پر نظر رکھی جا رہی ہے۔
