نئی دہلیاسلام آباد (ملت ٹائمز)
پاکستان قومی اسمبلی ا نتخابات کے غیر سرکاری اور غیر حتمی نتائج کے مطابق پاکستان تحریک انصاف سب سے آگے ہے اور سابق کرکٹر عمران خان کا وزیر اعظم بننا تقریبایقینی ہوچکاہے ۔عمران خان کی اس کامیابی پر مختلف پاکستانی و غیر ملکی کھلاڑیوں کی جانب سے عمران خان کو مبارکباد دیے جانے کا سلسلہ جاری ہے۔
پاکستان کرکٹ ٹیم کے سابق کپتان شاہدخان آفریدی نے عمران خان کو مبارکباددیتے ہوئےاپنے ٹوئیٹ میں کہا کہ’تحریک انصاف اور عمران خان کو تاریخی کامیابی پر مبارکباد پیش کرتا ہوں۔‘آفریدی نے کہا کہ’22 سالہ جہدوجہد آخر کار رنگ لے آئی، پاکستان کو آپ سے بہت توقعات ہیں، مجھے ا±مید ہے کہ آپ حقیقی لیڈر ثابت ہوں گے۔‘ انہوں نے مزید کہا کہ میں تمام دیگر پارٹیوں سے درخواست کرتا ہوں کہ وہ نتائج کو تسلیم کریں اور ملک کی ترقی میں کردار ادا کریں۔
پاکستان کرکٹ ٹیم کے سابق کپتان وسیم اکرم نے بھی انتخابات میں کامیابی پر عمران خان کو مبارکباددی۔ انہوں نے کہا کہ عمران خان نے اپنی کپتانی میں پاکستان کرکٹ ٹیم کوبلندیوں پر پہنچایا ،امید ہے کہ وہ بطور وزیر اعظم بھی پاکستان کوترقی کے آسمان پر لے جائیں گے۔
وسیم اکرم نے کہا کہ عمران خان کو کام کرنے دیں، وہ عوام کا مستقبل بہتر بنائیں گے۔
قومی کرکٹر محمد حفیظ نے بھی عمران خان کی کامیابی پر خوشی کا اظہار کرتے ہوئے ٹوئٹ شیئر کیا ہے جس میں انہوں نے لکھا کہ ’ماشائاللہ!! آپ نے ایک بار پھر کر دکھایا، کرپشن کے خلاف یہ طویل جدو جہد تھی‘۔انہوں نے مزید کہا کہ ’عمران خان طاقتور، بھروسہ مند اور بہترین رہنماہیں،بنے گا نیا پاکستان، انشاءاللہ۔‘
برطانوی نڑاد پاکستانی باکسر عامر خان نے عمران خان کے لیے نیک خواہشات کا اظہارکیا ہے اور کہا کہ پاکستان کو مل کر بہتر بنائیں۔
غیر ملکی کھلاڑیوں میں ویسٹ انڈیز کرکٹ ٹیم کے سابق فاسٹ بولر ای ین بشپ نے عمران خان کو مبارکباد دیتے ہوئے کہا کہ ’پاکستان کے نئے وزیر اعظم کو دلی مبارکباد پیش کرتا ہوں، وزیر اعظم عمران خان۔ ‘
انہوں نے عمران خان کو دعا دیتے ہوئے مزید کہا کہ امید ہے آپ ایک مثالی لیڈر کے طور پر اپنے ملک کی خدمت کریں۔
شعیب اختر نے بھی مبارکباد دیتے ہوئے کہا کہ یہ عمران خان کی 22 سالہ محنت کا نتیجہ ہے۔عمران خان کے سوا کون پاکستان کا بڑا اور بہتر لیڈر ہو سکتا ہے۔
انہوں نے کہا کہ وہ بہت خاص ہیں اور ہمیں فخر ہے کہ ہمیں عمران خان جیسا وزیر اعظم ملے گا۔کمنٹیٹرہرشا بوگلے نے کہا عمران خان کو قوم کی رہنما ئی کرتا دیکھنا دلچسپ ہوگا۔
چیئرمین آئی پی ایل راجیوشکلا نے بھی ایک پیغام میں عمران خان کو مبارکباد دی۔
(بشکریہ روزنامہ جنگ پاکستان)
