مودی کام کی باتوں کے علاوہ ساری باتیں کرتے ہیں:دگ وجے سنگھ
بھوپال(آئی این ایس انڈیا)
مدھیہ پردیش کے بھوپال پارلیمانی حلقہ سے کانگریس امیدواردگ وجے سنگھ نے آج وزیر اعظم نریندر مودی پر نکتہ چینی کرتے ہوئے کہا کہ لیڈر کا قد اس کے سینے کے ناپ سے نہیں، بلکہ کام سے پتہ چلتا ہے۔مسٹردگ وجے سنگھ نے آج ٹویٹ کرتے ہوئے مسٹرمودی کی نکتہ چینی کی۔ انہوں نے کہاہے کہ لیڈر کا قد اس کے سینے کے ناپ سے نہیں، کام سے پتہ چلتا ہے۔ مسٹر مودی نے 2014 میں جو وعدے کئے تھے، ان کی کامیابی پربات کرنی تھی، لیکن وہ تو کام کی بات چھوڑکرہر مسئلہ پر بول رہے ہیں۔انہوں نے کہا کہ مسٹر مودی پنک ریوولیوشن پر بہت بولے تھے۔ بیف برآمد ات پر پابندی لگانے کا وعدہ تھا۔ لیکن بی جے پی کے دورہ حکومت میں یہ مزید بڑھ گیا۔ بھارت دنیا کا 18 فیصد سے زیادہ گوشت کی برآمدات کرتا ہے۔ ایک طرف کاروبار چلتا رہا، دوسری طرف گائے کے نام پر بے گناہ انسانوں کی ہلاکتیں ہوتی رہیں۔ سب کچھ انتخابی جملہ ہے۔انہوں نے کئی حلقوں میں مودی حکومت پر وعدہ خلافی کا الزام لگاتے ہوئے کہا کہ حکومت بیمار ہے اور اچھے دن پتہ نہیں کہاں ہیں۔
