بنگلور(یو این آئی )
کرناٹک میں بی جے پی نے اپنی حکومت بناتے ہی شیر میسور ٹیپوسلطان کی جینتی منانے کا سرکاری پروگرام منسوخ کردیاہے ۔ بی جے پی کے اس فیصلے کے خلاف کانگریس نے سخت ردعمل کا اظہار کیاہے اور اور تعلق پوری ریاست میں تحریک چلانے کا اعلان کیاہے ۔
کانگریس کے ریاستی سینئر رہنماوں کی جانب سے جمعرات کو ایک میٹنگ میں یہ فیصلہ کیا گیا۔ میٹنگ میں کانگریس اراکین اسمبلی پارٹی کے لیڈر سدارمیا، ریاستی کانگریس کے صدر دنیش گنڈوراو، ایچ کے پاٹل، ایچ سی مہادیوپَّا اور دیگر رہنما موجود تھے۔ میٹنگ میں یہ بھی فیصلہ کیا گیا کہ بی جے پی حکومت کے اس حکم کے خلاف ریاست کے عوام سے رائے لی جائے گی۔
وزیر اعلیٰ بی ایس یدی یورپا نے گذشتہ ہفتے ریاست کی باگ ڈور سنبھالنے کے بعد شیر میسور ٹیپو سلطان کی جینتی پر سرکاری تقریب کے انعقاد کو رد کیے جانے کا اعلان کیا تھا۔ یہ فیصلہ بی جے پی کے جی بوپیَّا کی اس عرضی کے تناظر میں کیا گیا جس میں کہا گیا تھا کہ ضلع میسور کے لوگوں نے سابقہ حکومت کے حکم پر سخت اعتراض ظاہر کیا ہے۔
کانگریس کے رہنماوں کا کہنا ہے کہ ٹیپو کی جینتی کا انعقاد رد کیے جانے کے فیصلے سے بی جے پی حکومت کے ذریعے اس شخص کی بے حرمتی ظاہر ہوتی ہے جس نے برطانوی نو آبادیات کے خلاف جنگ کی اور شہید ہوئے۔پارٹی ذرائع کے مطابق کانگریس کے رہنماوں نے ان اسمبلی سیٹوں پر مضبوط امیدوار اتارنے کا فیصلہ کیا ہے جو 15 باغی اراکین اسمبلی کے نا اہل ٹھہرائے جانے کے بعد خالی ہوئی ہیں۔
