امت شاہ نے ایوان میں کشمیر کی تشکیل نو کی تجویز بھی پیش کی ۔ ان کے اعلان کے بعد اپوزیشن نے ایوان میں زبردست ہنگامہ شروع کردیا ۔ اپوزیشن کا الزام ہے کہ حکومت نے انہیں اس طرح کے کسی بل کی پہلے جانکاری نہیں دی تھی
وزیر داخلہ امت شاہ نے راجیہ سبھا میں تین سنکلپ پیش کئ ۔ ان میں سے پہلے سنکلپ کو رکھتے ہوئے شاہ نے کہا کہ آرٹیکل 370 کو ہٹادیا گیا ہے ۔ دوسرا آرٹیکل 35 اے کو بھی ختم کردیا گیا ہے ۔ تیسرا جموں و کشمیر کو مرکز کے زیر انتظام علاقہ بنادیا گیا ہے ۔ مطلب لداخ کو جموں و کشمیر سے الگ کردیا گیا ہے ۔ اب لداخ بھی الگ مرکزی کے زیر انتظام علاقہ ہوگا ۔ حالانکہ جموں و کشمیر میں اسمبلی بنی رہے گی ۔
خیال رہے کہ اس سے پہلے وزیر اعظم مودی کی رہائش گاہ پر کابینہ کی میٹنگ ہوئی ، جس کے بعد وزیر داخلہ امت شاہ نے راجیہ سبھا میں بیان دیتے ہوئے اس بات کا اعلان کیا ۔ وزیر اعظم کی کابینہ میٹنگ کے بعد کوئی پریس کانفرنس نہیں کی گئی تھی ۔
دوسری طرف ایسی خبریں بھی ہیں کہ وزیر داخلہ امت شاہ کے اگلے ہفتہ کشمیر دورہ کی بھی تیاری ہے ۔ کشمیر میں جاری کشیدگی کے درمیان امت شاہ نے گزشتہ روز اعلی سطحی میٹنگ کی تھی ، جس میں قومی سلامتی کے مشیر اجیت ڈوبھال اور داخلہ سکریٹری کے ساتھ ساتھ خفیہ ایجنسیوں کے اہلکار بھی شامل تھے ۔ بعد ازاں پورے حالات کے بارے میں وزیر اعظم مودی کو جانکاری دی گئی تھی ۔
ادھر سری نگر میں گزشتہ روز کشمیری پارٹیوں نے ایک مشترکہ میٹنگ کی ، جس میں اعلان کیا کہ وہ ریاست کے خصوصی درجہ کے ساتھ چھیڑ چھاڑ کی کسی بھی کوشش کی مخالفت کریں گے ۔ نظر بند لیڈروں نے لوگوں سے اپیل کی وہ صبر سے کام لیں اور ایسا کوئی قدم نہ اٹھائیں ، جس کی وجہ سے وادی کے امن میں خلل پڑے
