فڑنویس کے استعفیٰ کے بعد مہاراشٹر کی سیاست گرم ہو گئی ہے۔ ایک طرف ادھو ٹھاکرے اپنے سبھی اراکین اسمبلی سے میٹنگ کرنے والے ہیں اور دوسری طرف سنجے راؤت این سی پی سربراہ شرد پوار سے ملیں گے۔
شیوسینا کی ضد نے اپنا اثر دکھا دیا ہے اور وزیر اعلیٰ دیویندر فڑنویس کو اپنے عہدہ سے استعفیٰ دینا پڑ گیا ہے۔ انھوں نے گورنر بھگت سنگھ کوشیاری سے ملاقات کر کے انھیں اپنا استعفیٰ نامہ سونپ دیا۔ استعفیٰ سونپنے کے بعد فڑنویس نے پریس کانفرنس سے خطاب کیا جس میں انھوں نے کہا کہ وہ اتحاد کی حکومت قائم کرنا چاہتے تھے لیکن ادھو ٹھاکرے نے کہا کہ ان کے لیے سبھی راستے کھلے ہیں۔
Mumbai: Maharashtra Chief Minister Devendra Fadnavis and other state ministers meet Governor Bhagat Singh Koshyari at Raj Bhawan. pic.twitter.com/grmCMrHLg9
— ANI (@ANI) November 8, 2019
دیویندر فڑنویس نے پریس کانفرنس کے دوران ادھو ٹھاکرے پر کئی طرح کے الزامات عائد کیے۔ انھوں نے یہ بھی کہا کہ الیکشن کا نتیجہ برآمد ہونے کے بعد ادھو جی نے ان سے فون پر بات نہیں کی بلکہ این سی پی-کانگریس سے بات چیت کرنا انھوں نے زیادہ مناسب سمجھا۔ پریس کانفرنس میں فڑنویس نے گزشتہ پانچ سالوں میں کیے گئے اپنے کاموں کی تفصیلات بھی پیش کیں اور کہا کہ انھوں نے ریاست کی ترقی اور فروغ کے لیے ہر ضروری قدم اٹھائے۔
فڑنویس نے شیوسینا کے ذریعہ ڈھائی ڈھائی سال کا وزیر اعلیٰ بنائے جانے سے متعلق معاہدہ کیے جانے کی باتوں کو پریس کانفرنس میں پوری طرح مسترد کر دیا۔ انھوں نے کہا کہ اس طرح کا کوئی معاہدہ شیوسینا کے ساتھ نہیں ہوا تھا اور انھیں افسوس ہے کہ شیوسینا نے بی جے پی کے ساتھ اتحاد کرنے کے باوجود حکومت سازی میں اس کا ساتھ نہیں دیا۔ فڑنویس نے یہ بھی کہا کہ انھوں نے ادھو ٹھاکرے کو کئی مرتبہ فون کیا لیکن انھوں نے بات نہیں کی۔ شیو سینا کے ذریعہ ڈھائی سال کے وزیر اعلیٰ عہدہ کے مطالبہ کے تعلق سے فڑنویس نے واضح لفظوں میں یہ بھی کہا کہ امت شاہ و نتن گڈکری نے بھی صاف صاف کہہ دیا ہے کہ کبھی بھی وزیر اعلیٰ عہدہ کی ڈھائی ڈھائی سال کے لیے تقسیم پر کوئی سمجھوتہ نہیں ہوا تھا۔
واضح رہے کہ فڑنویس کے استعفیٰ سے قبل نتن گڈکری نے بھی ڈھائی ڈھائی سال کے وزیر اعلیٰ سے والے معاہدہ پر اپنا رد عمل ظاہر کیا تھا۔ انھوں نے کہا تھا کہ وزیر اعلیٰ کی کرسی ڈھائی سال کے لیے شیوسینا کو دینے کا کبھی بھی وعدہ نہیں کیا گیا۔ گڈکری کا یہ بیان شیو سینا کے لیے ایک جھٹکا تصور کیا جا رہا تھا اور یہ صاف ہو گیا تھا کہ بی جے پی کسی بھی حال میں شیو سینا کو ڈھائی سال کے لیے وزیر اعلیٰ کا عہدہ نہیں دے گی۔
