برطانوی میڈیا کے مطابق وزیراعظم بورس جانس بھی کورونا وائرس سے متاثر ہو گئے ہیں، جس کے بعد انہوں نے خودساختہ قرنطینہ اختیار کر لیا ہے
لندن: دنیا میں قہر بن کر ٹوٹے کورونا وائرس نے برطانیہ کے شہزادے چارلس کے بعد اب برطانوی وزیراعظم بورس جانسن کو بھی اپنی زد میں لے لیا ہے۔ غری ملکی میڈیا رپورٹ کے مطابق چند علامتیں ظاہر ہونے پر برطانوی وزیراعظم کا کورونا وائرس کا ٹیسٹ کیا گیا جو مثبت پایا گیا۔
برطانوی میڈیا کے مطابق وزیراعظم بورس جانس بھی کورونا وائرس سے متاثر ہو گئے ہیں، جس کے بعد انہوں نے خودساختہ قرنطینہ اختیار کر لیا ہے تاہم وہ فون اور ویڈیو کال کے ذریعے ملکی امور کی انجام دہی جاری رکھیں گے۔
سوشل میڈیا ویب سائٹ ٹویٹر پر اپنے ویڈیو پیغام میں وزیراعظم بورس جانسن نے کہا ’’چند روز سے کچھ معمولی نوعیت کی علامتیں ظاہر ہونا شروع ہوئی تھیں، اس کے بعد کورونا وائرس کا ٹیسٹ کرایا جو مثبت آیا ہے اس لیے آئسولیشن میں جا رہا ہوں، تاہم ملکی امور ویڈیو کانفرنس کے ذریعے جاری رکھوں گا۔‘‘
وزیر اعظم جارج بورس جانسن کورونا وائرس کے حوالے سے کافی متحرک رہے ہیں اور اس دوران کافی میٹنگیں بھی کیں، غیرملکی وفد سے ملے ہیں اور شاہی خاندان سے بھی رابطہ رہا ہے جس کی وجہ سے شک کی بنا پر اب کابینہ سمیت اہم شخصیات کے ٹیسٹ بھی کیے جائیں گے۔
واضح رہے کہ دو روز قبل 71 سالہ برطانوی شہزادہ چارلس میں بھی کورونا وائرس کی تصدیق ہوئی تھی، جس کے بعد انہیں قرنطینہ کر دیا گیا تھا جب کہ شاہی خاندان کو پہلے ہی 70 سے زائد عمر کے شاہی ممبران کو قرنطینہ کا مشورہ دیا گیا تھا جس پر عمل درآمد کرتے ہوئے تمام تقریبات منسوخ کر دی گئی تھیں۔
خیال رہے کہ برطانیہ میں 12 ہزار سے زائد افراد میں کورونا وائرس کی تصدیق ہوئی ہے جب کہ اس مہلک وائرس سے ہلاک ہونے والوں کی تعداد 600 سے تجاوز کر گئی ہے جس کے باعث ملک بھر میں لاک ڈاؤن کی صورت حال ہے اور عوامی مقامات بند ہیں۔
