اینٹی وائرس میکافی کے تخلیق کار اور ڈیجیٹل کرنسیوں سے وابستہ ایک متنازعہ شخصیت جان میکافی نے گزشتہ روز ہسپانوی جیل میں خودکشی کر لی
اینٹی وائرس میکافی کے تخلیق کار اور ڈیجیٹل کرنسیوں سے وابستہ ایک متنازعہ شخصیت جان میکافی نے گزشتہ روز ہسپانوی جیل میں خودکشی کر لی۔ غیر ملکی خبر ایجنسی کے مطابق اسپین کے شہر بارسلونا کی عدالت نے جان میکافی کو امریکہ کے حوالے کرنے کا حکم دیا تھا۔
علاقائی حکومت کے ایک بیان میں کہا گیا ہے کہ سیکیورٹی اہلکاروں نے انہیں ہوش میں لانے کی کوشش کی لیکن جیل کی میڈیکل ٹیم نے آخر کار ان کی موت کی تصدیق کر دی۔ بیان میں کہا گیا ہے کہ ’’عدالتی وفد موت کی وجوہات کی تحقیقات کرنے پہنچا اور ہر چیز خودکشی سے موت کی نشاندہی کرتی ہے۔”
خیال رہے کہ جان میکافی پر امریکہ میں ٹیکس چوری کا الزام تھا اور انہیں اکتوبر 2020 میں اسپین میں گرفتار کیا گیا تھا۔ جان میکافی پر 2014ء سے 2018ء تک ٹیکس ریٹرنز جمع نہ کرانے کا الزام تھا، ان پر اثاثے چھپانے کا بھی الزام تھا، انہوں نے اپنی آمدنی دوسروں کے نام پر اکاؤنٹس میں جمع کی تھی۔
جان مکافی مشاورت، لیکچرنگ، کریپٹو کرنسی اور دیگر ایسے ہی مختلف شعبوں میں اپنے کام کرنے کے بعد مشہور اور دولت مند بنے تھے۔ میکافی حالیہ برسوں میں بار بار یہ ذکر کر چکے تھے کہ ان کے خلاف ایک سازش رچی جا رہی ہے اور لوگ انہیں گرفتار کرنے کے درپے ہیں لیکن عدالت کا ماننا ہے کہ اس بارے میں کوئی حتمی ثبوت موجود نہیں ہے کہ ان کے خلاف سیاسی یا نظریاتی وجوہات کی بناء پر قانونی کارروائی کی جارہی ہے۔ تاہم، میکافی کو گرفتار کر لیا گیا تھا اور کل بدھ کی صبح ہسپانوی قومی عدالت نے ان کی امریکہ حوالگی کا فیصلہ سنایا تھا۔
