پارلیمنٹ میں جاری تعطل کو ختم کرنے کےلئے حزب اختلاف پیگاسس جاسوسی معاملہ پر بحث چاہتا ہےلیکن حکومت ابھی تک اس کے لئے تیار نظر نہیں آ رہی ہے۔
پارلیمنٹ کےاندر آج کانگریس کی قیادت میں حزب اختلاف کی ایک میٹنگ ہو گی جس میں لوک سبھا اور راجیہ سبھا کے فلور لیڈرس شامل ہوں گے ۔ اس بات کے امکان بھی ظاہر کئے جا رہے ہیں کہ کانگریس کے سابق صدر راہل گاندھی بھی اس میٹنگ میں شرکت کر سکتےہیں۔
واضح رہے پارلیمنٹ کے مانسون اجلاس کے شروع ہوتے ہی پیگاسس جاسوسی معاملہ پر پارلیمنٹ میں ہنگامہ مچا ہوا ہے جس کی وجہ سے پارلیمنٹ کا کام کاج متاثر ہو رہاہے۔ حکومت حزب اختلاف کا پیگاسس جاسوسی معاملہ پر بحث کرانے کا مطالبہ نہیں مان رہی ہے۔ دوسری جانب حزب اختلاف اس معاملہ پربحث چاہتا ہےاور یہ جاننا چاہتا ہےکہ حکومت نے پیگاسس سافٹ ویئر لیا ہےیا نہیں۔
ذرائع کے مطابق آج کی میٹنگ راجیہ سبھا میں حزب اختلاف کے رہنما کھڑگے کے کمرے میں ہو گی اور اس میں زیادر تر اپوزیشن کے رہنما شرکت کریں گے۔واضح رہے پیگاسس معاملہ کی سنوائی سپریم کورٹ میں بھی شروع ہو گئی ہے اس لئے حکومت کی پریشانیوں میں مستقل اضافہ ہوتا نظر آ رہاہے۔ اس مدے پر پہلے بھی کئی مرتبہ حزب اختلاف کے رہنماؤں کی میٹنگ ہو چکی ہے۔ کانگریس کےسابق صدر راہل گاندھی نےحزب اختلاف کے رہنماؤں کو ناشتے پر بھی مدوعو کیا تھا۔
(بشکریہ قومی آواز)
