آج صبح گجرات کے امریلی سے دل دہلا دینے والے سڑک حادثہ کی خبر موصول ہوئی جس میں ایک ٹرک نے سڑک کے کنارے سو رہے کئی مزدوروں کو کچل دیا۔
گجرات کے امریلی میں آج صبح ایک بڑا سڑک حادثہ پیش آیا۔ امریلی میں ایک بے قابو ٹرک نے سڑک کے کنارے سو رہے قریب دس مزدوروں کو کچل دیا اور خبر ہے کہ ان میں سے آٹھ غریب مزدور ہلاک ہو گئے ہیں باقی لوگوں کو مقامی اسپتال میں داخل کرایا گیا ہے جہاں وہ زیر علاج ہیں۔
اے بی پی نیوز پورٹل پر شائع خبر کے مطابق یہ حادثہ امریلی میں ساور کنڈلا کے باڑھڈا گاؤں کے قریب ہوا۔ یہ حادثہ صبح تین بجے کے آس پاس پیش آیا۔ حادثہ کے بعد مچی چیخ و پکار سے علاقہ میں کہرام مچ گیا جس کے بعد مقامی پولیس موقع پر پہنچی اور زخمیوں کو اسپتال لے کر گئی جہاں ان کا علاج چل رہا ہے۔
واضح رہے حادثہ کے بعد گجرات کے وزیر اعلی وجے روپانی نے اس کی فوری جانچ کا حکم دیا ہے اور مرنے والوں کے اہل خانہ کو چار لاکھ روپے کا معاوضہ دینے کا اعلان کیا ہے۔ دوسری جانب پولیس نے اس بے قابو ٹرک کے ڈرائیور کو گرفتار کر لیا ہے اور اس سے پوچھ تاچھ شروع کر دی ہے۔
