نئی دہلی: دہلی میں سپریم کورٹ کے سامنے خود سوزی کرنے والی خاتون کی منگل کو رام منوہر لوہیا اسپتال میں موت ہوگئی، جبکہ نوجوان کی موت پہلے ہی ہوچکی ہے۔ سپریم کورٹ کے باہر 16 اگست کو ایک خاتون اور مرد نے خود کو آگ لگالی تھی۔ دونوں کو سنگین حالت میں رام منوہر لوہیا اسپتال میں داخل کرایا گیا تھا۔ خاتون کی علاج کے دوران موت ہوگئی جبکہ نوجوان کی علاج کے دوران 21 اگست کو موت ہوگئی ہے۔ مناسب شناختی کارڈ نہ ہونے کی وجہ سے سیکورٹی اہلکاروں نے انہیں روک لیا تھا۔ اس کے بعد دونوں نے خود پر آتش گیر مواد ڈال کر آگ لگالی تھی۔ خیال رہے کہ اسپتال لے جاتے ہوئے خاتون نے پولیس کو بیان دیا تھا کہ اس نے بی ایس پی رکن پارلیمان کے خلاف معاملہ درج کرایا تھا۔ یہ معاملہ وارانسی میں چل رہا ہے، لیکن سماعت نہیں ہو رہی ہے۔ اس لئے وہ سپریم کورٹ آئے تھے۔
