ایک نابالغ مسلم لڑکی کے اغوا کے سلسلے میں تریپورہ پولیس نے ہندو یووا واہنی سے وابستہ رہنما کو ’’ اغوا کاروں کی مدد کرنے ‘‘ کے الزام میں گرفتار کر لیا۔
تریپورہ کے بشالگڑھ میں پولیس نے جمعہ کو ہندو یووا واہنی سے وابستہ رہنما کو اقلیتی طبقے سے وابستہ لڑکی کے اغوا کے معاملے میں گرفتار کر لیا۔
پولیس ذرائع کے مطابق ملزم سومن سرکار، جو بشل گڑھ کے چندر نگر علاقے کا رہنے والا ہے، نے دُلال میاں نام کے ایک شخص کی نابالغ بیٹی کو مبینہ طور 24 جولائی کو چارلم اترپارہ میں واقع اس کی رہائش گاہ سے اغوا کر لیا۔
نابالغ لڑکی کے والد نے 25 جولائی کو بشل گڑھ زنانہ پولیس اسٹیشن میں اغوا کا مقدمہ درج کرایا تھا۔ تاہم اہل خانہ کے مطابق پولیس نے اس کیس میں زیادہ پیش رفت نہیں کی۔ میاں نے الزام عائد کیا کہ اس کیس کی تفتیشی افسر سوارنا دیبرما نے اپنے اثر و رسوخ سے تفتیش کو کافی حد تک متاثر اور سست کرنے کی کوشش کی۔
بعد ازاں دُلال میاں نے انصاف کے لیے تریپورہ ہائی کورٹ کا رخ کیا۔ عدالت کی مداخلت کے بعد پولیس نے اس کیس کی مناسب تفتیش شروع کی۔
جمعہ کو آگرتلہ کے ہندو یووا واہنی لیڈر تپن دیب ناتھ کو ’’ملزمین کی بھاگنے میں مدد‘‘ کے الزام میں گرفتار کیا گیا۔ ملزم کے والد پھلو سرکار اور لڑکے کے ایک دوست کو بھی بدھ کو اس واقعے کے سلسلے میں گرفتار کیا گیا تھا۔
دیب ناتھ نے اعتراف کیا کہ بشل گڑھ آفس ٹلہ کی رہنے والی باپی رانی داس نام کی خاتون نے ملزم اور مغویہ لڑکی کو تپن دیب ناتھ کے پاس بھیجا اور بعد میں اس نے ان کے لیے ایک رات کے رکنے کا انتظام بھی کیا۔
