پی چدمبرم نے کہا کہ گزشتہ 70 برسوں میں ملک نے جو کچھ بنایا ہے یہ حکومت انہیں کچھ چنندہ لوگوں کو فروخت کر رہی ہے۔ لوگوں کو اس خطرے کے تئیں بیدار ہونا چاہئے اور اس کی مخالفت کرنی چاہئے۔
گوا: کانگریس کے سینئر لیڈر اور سابق مرکزی وزیر پی چدمبرم نے روز افزوں بڑھتی بے روزگاری اور مرکز کی نیشنل مونیٹائزیشن پائپ لائن اسکیم کی سخت تنقید کرتے ہوئے اسے دن دہاڑے ڈکیتی قرار دیا ہے۔ پی چدمبرم نے اتوار کو یہاں یوتھ کانگریس کی نیشنل ایکزیکیوٹیو کی میٹنگ سے خطاب کرتے ہوئے کہا کہ گزشتہ 70 برسوں میں ملک نے جو کچھ بنایا ہے یہ حکومت انہیں کچھ چنندہ لوگوں کو فروخت کر رہی ہے۔ لوگوں کو اس خطرے کے تئیں بیدار ہونا چاہئے اور اس کی مخالفت کرنی چاہئے۔
انہوں نے کہا کہ حکومت نے یہ اسکیم نافذ کی ہے لیکن اس نے اس پالیسی پر کسی سے کوئی مشورہ نہیں کیا۔ اس معاملہ پر پارلیمنٹ میں کوئی بحث نہیں ہوئی۔ ان کا کہنا تھا کہ وہ جانتے ہیں کہ حکومت کبھی بھی اس معاملہ پر بحث کی اجازت نہیں دے گی۔
میٹنگ سے خطاب کرتے ہوئے یوتھ کانگریس کے صدر شری نواس بیوی نے کہا کہ دو دن تک چلنے والے اس پروگرام میں بے روزگاری، مہنگائی اور کسانوں اور دیگر امور پر بات چیت ہوگی اور اس کے لئے پورے ملک میں جو تحریک چلائی جائے گی اس کی حکمت عملی پر غور و خوض کیا جائے گا۔ میٹنگ میں گوا ریاستی کانگریس کے کئی سینئر لیڈروں نے حصہ لیا۔
