دربھنگہ: بہار میں دربھنگہ ضلع کے یونیورسیٹی تھانہ علاقہ میں بدمعاشوں نے جمعرات کی صبح دیوی کنکالی ماں مندر کے پجاری کا گولی مار کرقتل کر دیا، وہیں بھاگ رہے بدمعاشوں میں سے ایک کو گاﺅں والوں نے پیٹ۔ پیٹ کر مار ڈالا۔ دربھنگہ کے سنیئر پولیس سپرنٹنڈنٹ بابو رام نے یہاں بتایا کہ علی الصبح رام باغ محلہ واقع کنکالی مندر کے پجاری راجیو کمار جھا عرف انٹو کا بدمعاشوں نے گولی مار کرقتل کر دیا ہے، وہیں پجاری کے ساتھ سوئے ایک دیگر چرنجوی جھا عرف شمبھو گولی لگنے سے زخمی ہوگیا۔
بابو رام نے بتایا کہ زخمی شمبھو جھا کا علاج شہرکے ایک پرائیوٹ اسپتال میں چل رہا ہے۔ واقعہ سے مشتعل لوگوں نے بھاگ رہے بدمعاشوں کو پکڑلیا اور انہیں پیٹ۔ پیٹ کر زخمی کر دیا۔ انہوں نے بتایا کہ مشتعل لوگوں کی پیٹائی سے ایک بدمعاش پلکت سنگھ کی جائے وقوع پر ہی موت ہوگئی جبکہ زخمی دو لوگوں کا علاج اسپتال میں چل رہا ہے۔
انہوں نے بتایا کہ واقعہ میں شامل ایک دیگر بدمعاش فرار ہوگیا ہے، جس کی گرفتاری کے لئے چھاپے ماری کی جا رہی ہے۔ اب تک جو جانکاری ملی ہے اس میں یہ بات سامنے آئی ہے کہ موبائل فون کے سلسلے میں پجاری کے بھتیجے اور بدمعاشوں کے مابین جھگڑا ہوا تھا، جس کی وجہ سے علی الصبح کار پر سوار ہو کر آئے چار بدمعاشوں نے پجاری کا قتل کر دیا۔ اس واقعہ میں استعمال کار کو پولیس نے ضبط کرلیا ہے۔
سنیئر پولیس سپرنٹنڈنٹ بابو رام نے بتایا کہ زخمی دو بدمعاشوں کی شناخت نگر تھانہ علاقہ کے شوبھنکر پور محلہ باشندہ ابھیشیک راج اور یونیورسیٹی تھانہ علاقہ کے لکشمی نگر محلہ باشندہ ابھیجیت شریواستو کے طور پر کی گئی ہے۔ ان دونوں کا علاج اسپتال میں چل رہا ہے۔ انہوں نے بتایا کہ جائے وقوع سے ایک پستول بھی برآمد ہوئی ہے۔
