نئی دہلی: انکم ٹیکس کے محکمہ نے ممبئی کے دو ریئل اسٹیٹ بزنس گروپوں اور ان سے وابستہ کچھ افراد / اکائیوں کے خلاف تلاشی اور ضبطی مہم چلائی۔ تلاشی مہم 7 اکتوبر 2021 کو شروع ہوئی اور ممبئی، پونے، بارامتی، گووا اور جے پور میں پھیلے دونوں کمپنیوں کے تقریباً 70 احاطوں میں چلائی گئی۔
تلاشی کے دوران جمع کئے گئے ثبوتوں سے بادی النظر میں کئی بے حساب اور بے نامی لین دین کا انکشاف ہوا ہے۔ دونوں تجارتی گروپوں کی تقریباً 184 کروڑ روپئے کی بے حساب آمدنی سے جڑے جرائم کو ثابت کرنے والے دستاویز برآمد کئے گئے ہیں۔
چھاپہ ماری سے ان تجارتی گروپوں کے ذریعے کئی کمپنیوں کے ساتھ لین دین کا پتہ چلا ہے، جو بادی النظر میں مشکوک معلوم ہوتا ہے۔ فنڈز کے بہاؤ کے ابتدائی تجزیے سے اشارہ ملتا ہے کہ فرضی شیئر پریمیم پیش کرنے، مشکوک غیر محفوظ قرض، کچھ خدمات کے لئے غیر مصدقہ پیشگی رقم کی موصولگی، فرضی تنازعات سے ملی بھگت والے ثالثی سودوں جیسے متعدد مشکوک طریقوں سے گروپ میں بے حساب دولت لائی گئی۔ یہ بھی پایا گیا کہ دولت کا یہ مشکوک بہاؤ مہاراشٹر کے مؤثر خاندان کی ملی بھگت سے ہوا۔
مشکوک طریقے سے جمع کی گئی رقم کا استعمال متعدد جائیدادوں کی تحویل کے لئے کیا گیا، جیسے ممبئی کے ایک اہم علاقہ میں آفس کی عمارت، دہلی کے ایک پوش علاقے میں فلیٹ، گوا میں ریسورٹ، مہاراشٹر میں زرعی زمین اور چینی ملوں میں سرمایہ کاری، ان جائیدادوں کی کل مارکیٹ لاگت تقریباً 170 کروڑ روپئے ہے۔
چھاپے ماری میں 2.13 کروڑ روپئے کی بے حساب نقدی اور 4.32 کروڑ روپئے کے زیورات ضبط کئے گئے ہیں۔
معاملے کی مزید جانچ جاری ہے۔
