پنجاب کے اودھم پور سے چھتیس گڑھ کے دُرگ کی طرف جا رہی اودھم پور-دُرگ سپرفاسٹ ایکسپریس ٹرین جمعہ کے روز ‘دی برننگ ٹرین’ میں بدل گئی۔ اچانک لگی آگ میں اس گاڑی کے چار کوچ بری طرح جل کر خاک ہو گئے۔ ان کوچوں میں سوار کسی بھی مسافر کو کوئی نقصان نہیں ہوا ہے اور سبھی پوری طرح محفوظ ہیں۔ حادثے کے بعد راحت کا کام جاری ہے۔
موصولہ اطلاعات کے مطابق اودھم پور-دُرگ سپرفاسٹ ایکسپریس ٹرین آج جب مدھیہ پردیش کے مرینا کے ہوتم پور کے قریب تھی تبھی اس میں اچانک آگ کی لپٹیں اٹھنے لگیں۔ اس سے آگ کی زد میں چار اے سی کوچ آ گئے۔ اٹھتے دھوئیں اور آگ کے درمیان مسافروں نے ٹرین سے اتر کر اپنی جان بچائی۔ اس حادثے میں کسی طرح کا جانی نقصان نہیں ہوا ہے۔
Morena, Madhya Pradesh | Udhampur-Durg Express's A1 & A2 coaches reported fire due to unknown reasons after leaving the Hetampur Railway Station; no casualties were reported & passengers have been evacuated: Dr Shivam Sharma, CPRO/NCR
(Video Courtesy: Unverified Source) pic.twitter.com/xzRnk7Xja2
— ANI (@ANI) November 26, 2021
جھانسی ڈویژن کے رابطہ عامہ افسر منوج سنگھ نے بتایا کہ یہ حادثہ ہوتم پور کے قریب ہوا ہے۔ جن کوچز میں آگ لگی تھیں، وہ پیچھے کی طرف ہیں۔ ان کوچز کو الگ کر دیا گیا ہے اور متاثر ہوئے کوچ کے مسافروں کے لیے الگ سے کوچ لگائے جا رہے ہیں۔ اچھی بات یہ ہے کہ اس حادثہ میں کسی بھی مسافر کی جان نہیں گئی۔
بتایا گیا ہے کہ آگ نے کچھ ہی دیر میں خطرناک شکل اختیار کر لی تھی اور وہاں موجود لوگوں کو کچھ بھی سمجھ نہیں آ رہا تھا کہ اس پر کس طرح قابو پایا جائے۔ مسافروں نے کسی طرح ٹرین سے باہر نکل کر اپنی جان بچائی۔ موقع پر پہنچی پولیس فورس، انتظامیہ اور ریلوے ملازمین نے مسافروں کی مدد کی اور دمکل کی مدد سے آگ کو بجھایا گیا۔
