ملک میں کورونا دھماکہ، اب تک ایک لاکھ 17 ہزار سے زائد آئے نئے معاملے

نئی دہلی: ملک میں کورونا کے معاملے ایک مرتبہ پھر بے حد تیزرفتار سے بڑھ رہے ہیں۔ گزشتہ 24 گھنٹوں کے دوران ملک بھر سے کورونا کے ایک لاکھ 17 ہزار سے زیادہ نئے کیسز رپورٹ ہوئے ہیں۔ گزشتہ روز ملک بھر سے کورونا کے 90 ہزار سے زائد نئے کیسز سامنے آئے تھے لیکن 24 گھنٹوں کے دوران معاملوں میں 28.8 فیصد کا اضافہ درج کیا گیا ہے۔

ملک میں 7 مہینے کے بعد نئے کیسز کی تعداد ایک لاکھ سے تجاوز ہوئی ہے۔ اس سے قبل 6 جون کو ایک لاکھ سے زیاہ کورونا کے کیسز درج کئے گئے تھے۔ ملک میں اب تک کورونا کے 35226386 کیسز رپورٹ ہوئے ہیں۔

گزشتہ 24 گھنٹوں کے دوران مہاراشٹر میں 36265، مغربی بنگال میں 15421، دہلی میں 15097، تمل ناڈو میں 6983، کرناٹک میں 5031 معاملے درج کئے گئے۔ ملک میں کل کیسز میں سے 67.29 نئے کیسز ان 5 ریاستوں سے درج کئے گئے ہیں، جبکہ کل کیسز میں سے 30.97 فیصد مہاراشٹر سے وابستہ ہیں۔

ملک میں گزشتہ 24 گھنٹوں کے دوران 302 افراد ہلاک ہوئے ہیں، جبکہ ملک بھر میں اب تک 4.83 لاکھ لوگوں کی جان جا چکی ہے۔ ہندوستان میں شفایابی کی شرح 97.57 فیصد ہے۔ گزشتہ 24 گھنٹوں میں ملک بھر کے 30836 مریضوں نے شفایابی حاصل کر لی۔ اب تک مجموعی طور پر 34371845 افراد کورونا سے شفایاب ہو چکے ہیں۔

اومیکرون بحران: ملک میں اب تک 3007 معاملوں کی تصدیق

ملک بھر میں جہاں کورونا کے ایک لاکھ سے زیادہ نئے کیسز درج کئے گئے ہیں وہیں کورونا کی نئی قسم اومیکرون ویرینٹ کی رفتار تیز ہوگئی ہے۔ ملک میں اومیکرون کے اب تک 3007 معاملے کی تصدیق ہوچکی ہے۔ ان میں سے 1199 مریض ٹھیک ہوچکے ہیں۔اومیکرون اب تک ملک کی 27 ریاستوں تک پھیل چکا ہے۔

مرکزی وزارت صحت کے مطابق تاحال ملک بھر سے اومیکرون کے 3007 معاملات درج کئے گئے ہیں جبکہ 1199 افراد شفایاب ہو چکے ہیں۔ مہاراشٹر سے سب سے زیادہ 876 جبکہ دوسرے نمبر پر دہلی سے 465 اومیکرون کے معاملے درج کئے گئے ہیں۔تیسرے نمبر پر اب کرناٹک ہے جہاں 333معاملے سامنے آئے ہیں۔ چوتھے نمبر پر راجستھان ہے جہاں اب تک291معاملے سامنے آچکے ہیں۔

SHARE
ملت ٹائمز میں خوش آمدید ۔ اپنے علاقے کی خبریں ، گراﺅنڈ رپورٹس اور سیاسی ، سماجی ،تعلیمی اورادبی موضوعات پر اپنی تحریر آپ براہ راست ہمیں میل کرسکتے ہیں ۔ millattimesurdu@gmail.com