بہار: مغربی چمپارن میں سڑک حادثہ، چار افراد ہلاک، چار زخمی

بگہا: بہار میں مغربی چمپارن ضلع کے نورنگیہ تھانہ علاقے کے بالمیکی نگر بگہا مین روڈ پر منگل کی صبح ہوئے ایک سڑک حادثے میں چار افراد ہلاک اور چار دیگر زخمی ہو گئے۔ پولس ذرائع نے یہاں بتایا کہ والمیکی ٹائیگر ریزرو کے گھنے جنگل سے گزرنے والی بالمیکی نگر بگہا مین روڈ پر نورنگیہ تھانہ کے ہردیا چاتی کے قریب ایک بے قابو کار سڑک کے کنارے درخت سے ٹکرا گئی۔

اس حادثے میں کار میں سوار دو افراد کی موقع پر ہی موت ہو گئی، جبکہ چھ دیگر افراد زخمی ہو گئے۔ زخمیوں کو بگہا سب ڈویژنل اسپتال لایا گیا جہاں علاج کے دوران دو بچیوں کی موت ہوگئی۔ شدید زخمی چار افراد کی حالت تشویشناک بتائی جا رہی ہے۔

ذرائع نے بتایا کہ ضلع کے نول پور تھانہ کے کاولا پور گاؤں کے رہنے والے ادے نارائن ساہنی کے یہاں شادی تھی۔ ان کا بیٹا ناگمنی ڈرائیور رام بابو کے ساتھ شادی کی تقریب میں شرکت کے لیے بالمیکی نگر کے لو کش گھاٹ میں واقع اپنی بہن کے گھر گیا تھا۔ کار میں بہن اور دو بھانجیوں سمیت آٹھ افراد صبح شادی کی تقریب سے واپس آ رہے تھے تبھی یہ حادثہ ہوا۔ لاشوں کو پوسٹ مارٹم کے لیے بھیج دیا گیا ہے۔

SHARE
ملت ٹائمز میں خوش آمدید ۔ اپنے علاقے کی خبریں ، گراﺅنڈ رپورٹس اور سیاسی ، سماجی ،تعلیمی اورادبی موضوعات پر اپنی تحریر آپ براہ راست ہمیں میل کرسکتے ہیں ۔ millattimesurdu@gmail.com