نئی دہلی: اسپائس جیٹ کی دہلی سے دبئی جانے والی پرواز ایس جی-11 کی تکنیکی خرابی کے بعد پاکستانی شہر کراچی میں ہنگامی لینڈنگ کرائی گئی۔ معلومات کے مطابق طیارے میں سوار تمام مسافر محفوظ ہیں۔
واقعے کے بارے میں معلومات دیتے ہوئے اسپائس جیٹ کے ترجمان نے بتایا کہ لائٹس میں خرابی کے باعث اسپائس جیٹ کے بی 737 طیارے کا رخ کراچی کی طرف موڑ دیا گیا۔ طیارہ کراچی میں بحفاظت لینڈ کر گیا اور مسافروں کو بحفاظت اتار لیا گیا۔
ترجمان کا مزید کہنا تھا کہ لینڈنگ کے دوران کسی ہنگامی صورتحال کا اعلان نہیں کیا گیا اور طیارے کی نارمل لینڈنگ ہوئی۔ اس سے قبل طیارے میں کسی خرابی کی کوئی اطلاع نہیں تھی۔ مسافروں کو ریفریشمنٹ فراہم کیا گیا ہے۔ دوسرا طیارہ کراچی بھیجا جا رہا ہے جو مسافروں کو لے کر دبئی جائے گا۔
خیال رہے کہ اسی مہینے کی 2 جولائی کو دہلی سے جبل پور جانے والے اسپائس جیٹ کے طیارے کی بھی خرابی کے بعد ہنگامی لینڈنگ کرائی گئی تھی۔ اس طیارے کے کیبن میں دھواں نظر آیا تھا۔ اسپائس جیٹ کے ترجمان کے مطابق جب طیارہ ٹیک آف کے بعد 5000 فٹ کی بلندی پر پہنچا تو پائلٹ کے کیبن میں دھواں دیکھا گیا۔ اس کے بعد طیارے کو واپس دہلی ایئرپورٹ پر اتارا گیا۔
