احمدآباد: گجرات ہائی کورٹ نے غیر قانونی گوشت کی دکانوں اور کھلے میں فروخت ہونے والے گوشت کے بارے میں لاپرواہ رویے پر ریاستی حکومت کی سرزنش کی ہے۔ عدالت نے قانونی خدمات اتھارٹیوں (لیگل سروسز اتھارٹیز) سے کہا کہ وہ ایسی دکانوں کا سروے کر کے رپورٹ پیش کریں۔
چیف جسٹس اروند کمار اور جسٹس اے جے شاستری کی بنچ نے پیر کو ایک مفاد عامہ کی عرضی کی سماعت کی، جس میں عرضی گزار نے ریاست میں چل رہے غیر قانونی مذبح خانوں کا مسئلہ اٹھایا۔ عرضی گزار نے یہ بھی شکایت کی کہ حفظان صحت کے مناسب اصولوں کو برقرار رکھے بغیر گوشت کھلے عام فروخت کیا جا رہا ہے۔
شکایات کا سنجیدگی سے نوٹس لیتے ہوئے عدالت نے ریمارکس دیئے کہ ہائی کورٹ نے متعدد بار ریاست کو غیر قانونی مذبح خانے بند کرنے کو یقینی بنانے کی ہدایت کی ہے لیکن حکومت کی جانب سے کوئی کارروائی کیوں نہیں کی گئی؟ عدالت نے فوڈ سیکورٹی اور شہری ترقی کے محکموں کے متعلقہ افسران کو 30 جنوری کو ہونے والی اگلی سماعت پر پیش ہونے کو کہا ہے۔
