اتر پردیش کے نائب وزیر اعلی کیشو پرساد موریہ نے مختار انصاری کے اہل خانہ سے ملاقات کو لے کر سماجوادی پارٹی کے سربراہ اکھلیش کو نشانہ بنایا۔ جس پر مختار کے بھائی اور رکن پارلیمنٹ افضل انصاری نے جوابی وار کیا ہے۔ انہوں نے کہا کہ کیشو موریہ خود ایک مافیا ہے، ایک وقت میں ان کے خلاف 16 مقدمات تھے اور وہ دفعہ 302 کے تحت ملزم ہیں۔
نیوز پورٹل ‘اے بی پی’ پر شائع خبر کے مطابق جب اکھلیش یادو سے کیشو پرساد موریہ کے اس تبصرہ کے بارے میں پوچھا گیا کہ سماج وادی پارٹی ہمیشہ غنڈوں کی حمایت کرتی ہے، تو ایس پی سربراہ نے کہا تھا کہ ان (کیشو پرساد) سے بڑا مجرم کوئی نہیں ہو سکتا۔
دراصل، اکھلیش یادو 7 اپریل کو آنجہانی مختار انصاری کے انتقال پر اظہار تعزیت کرنے غازی پور پہنچے تھے اور ان کے بڑے بھائی افضل انصاری کے ساتھ وہاں موجود لوگوں سے ملے تھے۔ ان کے جانے کے بعد افضل انصاری نے صحافیوں سے بات کرتے ہوئے یوپی کے ڈپٹی سی ایم کیشو پرساد موریہ کے اکھلیش یادو کو مغرور بتانے والے بیان پر جوابی حملہ کیا اور انہیں مافیا قرار دیا۔
افضل انصاری نے کہا کہ ‘کیشو موریا کے خلاف 16 مقدمات تھے، وہ 302 کا ملزم ہے اور خود ایک مافیا ہے، وہ اسمبلی انتخابات ہار گئے لیکن یہ وہ بے شرم لوگ ہیں جو ہارنے کے بعد بھی عہدہ قبول کرتے ہیں، ایسے لوگ لمبی لمبی باتیں کرتے ہیں۔
آئندہ انتخابات کے بارے میں افضل انصاری نے کہا کہ چاہے کیشو پرساد موریہ ہو ں یا یوگی آدتیہ ناتھ یا مرکزی حکومت، عوام کے سامنے ان کا سحر ٹوٹ گیا ہے۔ انہوں نے پورے ملک کو نقصان پہنچایا ہے۔ ای وی ایم، الیکٹورل بانڈز جیسے مسائل کو دبا دیا گیا۔
جب میڈیا نے ڈپٹی سی ایم سے اکھلیش یادو کے مختار انصاری کے گھر جانے سے متعلق سوال پوچھا تو انہوں نے کہا کہ مختار انصاری ایس پی کی بیماری ہے اور بی جے پی پوری طرح سے صحت مند ہے۔ سماج وادی پارٹی ہمیشہ غنڈوں کی حمایت کرتی ہے۔
کل میڈیا سے بات کرتے ہوئے اکھلیش یادو نے کہا تھا کہ کیشو پرساد موریہ سے بڑا غنڈہ کون ہو سکتا ہے، اگر آپ کو کسی غنڈے کی تصویر نظر آئے تو اس کی بھی تصویر لگا دیں۔ اس وقت جمہوریت پر حملہ ہے۔ اس ملک کے عوام اس جمہوری حکومت کے خلاف ووٹ دیں گے۔
