ترکی کے صدر رجب طیب اردوآن نے کہا ہے کہ حکومت زلزلے سے متاثرہ افراد کی ’ریاست کو دستیاب تمام ذرائع سے مدد کرے گی۔‘
انقرہ: ترکی اور یونان میں جمعہ کے روز آنے والے شدید زلزلہ نے زبردست تبائی مچائی ہے۔ زلزلہ کے سبب بحریہ ایجہ میں آنے والی سونامی، جسے منی یا چھوٹی سونامی قرار دیا جا رہا ہے، کے تنیجہ میں بھی کافی جانی و مالی نقصان کی اطلاعات ہیں۔ سی این این کی رپورٹ کے مطابق اب تک ہلاک ہونے والے افراد کی تعداد بڑھ کر 26 ہو گئی ہے جبکہ 804 افراد زخمی ہوئے ہیں۔ زلزلہ سے ترکی کا شہر ازمیر سب سے زیادہ متاثرہ ہوا ہے۔
ترکی کے صدر رجب طیب اردآن نے استنبول میں ٹیلی ویژن خطاب کے دوران کہا کہ زلزلہ کے سبب تباہ شدہ 20 عمارتوں کے ملبہ سے لوگوں کو نکالنے کے لئے امدادی سرگرمیاں جاری ہیں۔ رجب طیب اردوآن نے کہا ہے کہ حکومت زلزلے سے متاثرہ افراد کی ’ریاست کو دستیاب تمام ذرائع سے مدد کرے گی۔‘
ترکی کے مغربی علاقے میں واقع ازمیر شہر میں زلزلے کے شدید جھٹکے محسوس ہوئے اور اس سے متعدد عمارتوں اور دیگر عمارتوں کو شدید نقصان پہنچا۔
ترکی کی ہنگامی ایجنسی نے بتایا کہ زلزلہ کے جھٹکے ازمیر شہر میں محسوس کیے گئے اور ریکٹر اسکیل پر اس کی شدت 6.6 بتائی جا رہی ہے۔ امریکی محکمہ ارضیاتی سروے (یو ایس جی ایس) کے مطابق زلزلے کی شدت ریکٹر اسکیل پر 7.0 ریکارڈ کی گئی۔ زلزلے کا مرکز بحر ایجہ میں بتایا جارہا ہے۔
ترکی کے صدارتی دفتر کے مطابق ایردوآن نے زلزلہ کے بارے میں یونان کے وزیر اعظم، کریاکوس میتسوتکیس سے فون پر گفتگو کی ہے۔ دونوں رہنماؤں نے زخمیوں کی جلد صحتیابی کے لئے دعا کی ہے۔
