حرمین شریفین کے امور کی جنرل پریذیڈنسی کی ایجنسی برائے مسجد نبوی (ﷺ) نے باور کرایا ہے کہ رمضان کی 27 ویں اور 29 ویں شب کو لوگوں کی بہت بڑی تعداد کے استقبال کے سلسلے میں تیاریاں مکمل کر لی گئی ہیں۔ آنے والوں میں نمازیوں اور معتمرین کے علاوہ زائرین اور مدینہ منورہ کے شہری شامل ہیں۔ اس مقصد کے لیے ایک جامع زمینی منصوبہ وضع کیا گیا ہے جس میں تمام متعلقہ انتظامیوں کو شامل کیا گیا ہے۔
مسجد نبوی کے امور کی ایجنسی نے مسجد، اس کی چھت اور صحنوں کو آنے والوں کی متوقع تعداد کو کھپانے کے لیے تیار کر لیا ہے۔ علاوہ ازیں 24 گھنٹے بہترین خدمات پیش کرنے کے بھی انتظامات مکمل ہیں۔ ایجنسی کے مطابق زائرین کی راحت اور سلامتی کے لیے مطلوبہ اقدامات کر لیے گئے ہیں تا کہ وہ اپنے اوقات عبادت اور اذکار میں سکون کے ساتھ گزار سکیں۔
اس سلسلے میں زائرین اور نمازیوں کے لیے خدمات کی نگرانی کے لیے مرد اور خواتین ملازمین اور کارکنان کی تعداد میں بھی اضافہ کر دیا گیا ہے۔ ایجنسی نے مسجد نبوی اور اس کے بیرونی صحنوں کے لیے 30 ہزار قالین تیار کر لیے ہیں۔ زائرین اور نمازیوں کے داخلے کی سہولت کے لیے مسجد کے 100 دروازوں کو کھول دیا گیا ہے۔ آب زمزم کی فراہمی کے لیے مسجد نبوی کے اندر 18 ہزار کولر موجود ہیں۔
(بشکریہ العربیہ ڈاٹ نیٹ)
