دمشق(ایجنسیاں)
اقوام متحدہ کے اہلکار کے مطابق شامی شہردوما میں موجود اقوام متحدہ کے حفاظتی دستوں پر فائرنگ کی گئی ہے۔ یہ واقعہ دوما میں مبینہ کیمیائی حملے کے تناظر میں وہاں بین الاقوامی ماہرین کی ایک تحقیقاتی ٹیم کی آمد سے قبل پیش آیا۔
مشرقی غوطہ کے دوما نامی شہر میں اقوام متحدہ کی سکیورٹی ٹیم پر حفاظتی صورتحال کے جائزے کے دوران فائرنگ کی گئی ہے۔ تاہم اقوام متحدہ کے اہلکار نے نیوز ایجنسی اے ایف پی کو بتایا کہ اس واقع میں کوئی شخص زخمی یا ہلاک نہیں ہوا اور سکیورٹی ٹیم کو واپس دمشق منتقل کر دیا گیا ہے۔رواں ماہ کی سات تاریخ کو دوما کے عام شہریوں پر زہریلی گیس کے مبینہ حملے میں چالیس سے زیادہ افراد ہلاک ہوئے تھے۔ مغربی طاقتوں کی جانب سے شامی صدر بشار الاسد کی حکومت پر اس مبینہ حملے کا الزام عائد کیا گیا تھا۔
فائرنگ کا یہ واقعہ اس وقت پیش آیا جب کیمیائی ہتھیاروں پر نظر رکھنے والی بین الاقوامی تنظیم ’او پی سی ڈبلیو‘ کے ماہرین کی ٹیم حملے کی چھان بین کے سلسلے میں سکیورٹی ٹیم کی جانب سے اجازت کا انتظار کر رہی تھیں۔ تاہم اب ممکن ہے کہ ’او پی سی ڈبلیو‘ کے بین الاقوامی ماہرین فی الوقت دمشق میں موجود رہیں۔قبل ازیں اقوام متحدہ میں تعینات شامی سفیر بشار جعفری نے بروز منگل سکیورٹی کونسل کو آگاہ کیا تھا کہ اقوام متحدہ کی سکیورٹی ٹیم کی اجازت کے بعد ’او پی سی ڈبلیو‘ کے ماہرین اپنی تحقیقات کا آغاز کرسکتے ہیں۔
تاہم شامی سفیر نے اس بات پر بھی زور تھا کہ شامی حکومت نے بھرپور تعاون کرنے کی کوشش کی ہے۔ لہٰذا اب یہ اقوام متحدہ کا فیصلہ ہے کہ موجودہ سکیورٹی حالات کے پیشِ نظر ’او پی سی ڈبلیو‘ کے ماہرین کو دوما میں تعینات کیا جائے۔
