واشنگٹن: امریکی حکومت کا کہنا ہے کہ شام میں امریکی خصوصی سلامتی دستوں کی کارروائی میں مارے گئے اسلامک اسٹیٹ کے سرغنہ ابو بکر البغدادی کی لاش کو سمندر میں دفن کر دیا گیا ہے۔ امریکی حکومت کے ذرائع نے بتایا کہ بغدادی کی لاش کو معیاری طریقہ عمل اور مسلح تنازعات قانون کے تحت مکمل طورپر پر اسلامی رسم و رواج کے مطابق سمندر میں دفن کر دیا گیا۔ حالانکہ انہوں نے یہ نہیں بتایا کہ اسے کس جگہ پر دفن کیا گیا اور اس عمل میں کل کتنا وقت لگا۔ انہوں نے بتایا کہ ان کا خیال ہے کہ بغدادی کی لاش کو طیارے سے سمندر میں ڈال دیا گیا ہے۔
ذرائع نے بتایا کہ بغدادی کی لاش کو فورنسک ڈی این اے جانچ کے لئے ایک محفوظ مرکز پر لے جایا گیا تھا تاکہ اس کی شناخت کی تصدیق ہو سکے۔ اس کے بعد اسے دفن کر دیا گیا ہے۔ اس سے پہلے القاعدہ کے سرغنہ اسامہ بن لادن کو بھی اسی طرح سمندر میں دفنایا گیا تھا لیکن اسے دفن کرنے سے پہلے کافی لمبا عمل اختیا کیا گیا تھا۔ اس کی لاش کو طیارہ بردار جہاز یوایس ایس کارل ونسن سے سمندر میں لے جایا گیا اور سفید چادر میں لپیٹ کر سمندر میں ڈال دیا گیا۔ لادن 2011 میں پاکستان کے ایبٹ ا?باد میں امریکی کارروائی میں مارا گیا تھا۔
ذرائع نے بتایا کہ بغدادی کو جس جگہ مارا گیا، وہاں سے کچھ سامان بھی ملا ہے لیکن اس کے بارے میں تفصیلی اطلاع نہیں دی گئی۔ انہوں نے بتایا کہ امریکی دستوں نے بغدادی کے دو ساتھیوں کو بھی حراست میں لیا ہے۔
