شارجہ
ملت ٹائمز
متحدہ عرب امارات میں “شارجہ بزنس وومن کونسل” کی سربراہ 38 سالہ امیرہ بنتِ کرم گھر میں آتش زدگی کے واقعے جاں بحق ہو گئیں۔ اس اندوہ ناک واقعے میں امیرہ کی 40 سالہ بہن اور 57 سالہ والدہ بھی اپنی جانوں سے ہاتھ دھو بیٹھیں جب کہ ان کا 32 سالہ بھائی دم گھٹنے کے سبب زخمی ہو گیا جس کو فوری طور پر شارقہ کے القاسمی ہسپتال منتقل کر دیا گیا۔
شارقہ میں شہری دفاع کے ذرائع نے بتایا ہے کہ ہفتے کی شام مقامی وقت کے مطابق 4 بج کر 34 منٹ پر گھر کے لاؤنج میں آگ بھڑک اٹھی جب کہ اس وقت تمام اہل خانہ اپنے کمروں میں سو رہے تھے۔ آگ لگنے سے دھواں بڑھتا ہوا کمروں میں داخل ہوگیا جس کے نتیجے میں ماں اور دونوں بیٹیاں دم گھٹنے سے جاں بحق ہو گئیں۔ آگ لگنے کے تقریبا چار منٹوں کے بعد ایک پڑوسی نے شہری دفاع کی ٹیم کو اطلاع دی جس کے بعد چند منٹوں میں آگ بجھانے والی گاڑیاں پہنچ گئیں اور آگ پر قابو پالیا گیا۔ عربی روزنامے الامارات الیوم کے مطابق امیرہ کے زخمی بھائی کو القاسمی ہسپتال منتقل کیا گیا جب کہ والد واقعے کے وقت گھر سے باہر تھے۔
شارجہ کے حکمراں کی اہلیہ الشیخہ جواہر بنت محمد القاسمی کی جانب سے امیرہ بنتِ کرم ، ان کی بہن اور والدہ کی وفات پر تعزیت کا اظہار کیا ہے۔
