کامن ویلتھ گیمز 2022 : نکہت زرین اور شرت کمل ہوں گے اختتامی تقریب میں ہندوستانی پرچم بردار

انگلینڈ کے برمنگھم میں کھیلے جا رہے 22ویں کامن ویلتھ گیمز کا آج یعنی 8 اگست کو آخری دن ہے۔ آج ہی ان کھیلوں کا اختتام ہو جائے گا اور اختتامی تقریب کا انعقاد عمل میں آئے گا۔ اس اختتامی تقریب میں ایک بار پھر سبھی ممالک کے نئے پرچم بردار دکھائی دیں گے۔ ہندوستان کی طرف سے اختتامی تقریب میں پرچم بردار خاتون باکسر نکہت زرین اور ٹیبل ٹینس کھلاڑی شرت کمل ہوں گے۔ قابل ذکر ہے کہ افتتاحی تقریب میں بیڈمنٹن اسٹار پی وی سندھو اور مرد ہاکی ٹیم کے کپتان منپریت سنگھ نے ہندوستان کے لیے پرچم برداری کی تھی۔ ہندوستانی ٹیم کے چیف راجیش بھنڈاری نے اختتامی تقریب میں نکہت زرین اور شرت کمل کے ذریعہ پرچم برداری کیے جانے کی تصدیق کی ہے۔

واضح رہے کہ اس بار کامن ویلتھ گیمز میں باکسر نکہت زرین نے طلائی تمغہ حاصل کیا ہے۔ نکہت نے 50-48 کلو فلائی ویٹ کے فائنل میں شمالی آئرلینڈ کی کارلی ایم سی ناؤل کو 0-5 سے شکست دی تھی۔ ہندوستانی ٹیم کا یہ باکسنگ میں تیسرا طلائی تمغہ رہا تھا۔ دوسری طرف 40 سالہ شرت کمل نے ٹیبل ٹینس کے کھیل میں بہترین کارکردگی کا مظاہرہ کیا اور مجموعی طور پر 4 تمغے اپنے نام کیے۔ انھوں نے مرد ٹیم اور مکسڈ ٹیم میں طلائی تمغہ، جب کہ مرد ڈبلز میں نقرئی تمغہ حاصل کیا۔ انھیں ابھی مرد سنگلز کے طلائی تمغہ کے لیے میچ میں کھیلنا باقی ہے، یعنی ایک تمغہ یقینی ہے۔

ہندوستان نے دسویں دن یعنی اتوار کو مجموعی طور پر 15 تمغے حاصل کیے تھے۔ گیارہویں دن ہندوستان نے طلائی تمغہ سے کھاتہ کھولا۔ اس کے ساتھ ہندوستان اب میڈل کی فہرست میں چوتھے مقام پر پہنچ گیا ہے۔ ہندوستان کے نام 19 طلائی تمغے، 15 نقرئی تمغے اور 22 کانسے کے تمغے ہیں۔ میڈل کی فہرست میں 66 طلائی تمغے، 55 نقرئی اور 53 کانسے کے تمغوں کے ساتھ آسٹریلیا ٹاپ پر ہے۔ میزبان انگلینڈ 55 طلائی تمغوں کے ساتھ دوسرے اور کناڈا 22 طلائی تمغوں کے ساتھ تیسرے مقام پر ہے۔ نیوزی لینڈ ہندوستان سے ایک مقام نیچے یعنی پانچویں پائیدان پر ہے۔

SHARE
ملت ٹائمز میں خوش آمدید ۔ اپنے علاقے کی خبریں ، گراﺅنڈ رپورٹس اور سیاسی ، سماجی ،تعلیمی اورادبی موضوعات پر اپنی تحریر آپ براہ راست ہمیں میل کرسکتے ہیں ۔ millattimesurdu@gmail.com