بنگلہ دیش میں مال گاڑی اور مسافر ٹرین میں شدید ٹکر کی خبر سامنے آ رہی ہے۔ میڈیا رپورٹس کے مطابق بنگلہ دیش کے کشور گنج میں ایک مسافر ٹرین اور مال گاڑی کے درمیان زوردار ٹکر ہوئی جس میں کم از کم 15 افراد ہلاک ہو گئے ہیں اور 100 سے زائد زخمی ہوئے ہیں جن میں کچھ کی حالت انتہائی سنگین ہے۔
#BangladeshTrainAccident: बांग्लादेश में दो ट्रेनों की टक्कर में 15 की मौत, 100 से अधिक घायल #TrainAccident https://t.co/B5ZU2r5Kjt
— Times Now Navbharat (@TNNavbharat) October 23, 2023
بتایا جاتا ہے کہ ٹرین حادثہ بنگلہ دیش کی راجدھانی ڈھاکہ سے تقریباً 80 کلومیٹر دور بھیرو علاقے میں ہوئی۔ مقامی میڈیا نے جائے حادثہ پر موجود لوگوں کے حوالے سے بتایا ہے کہ حادثہ میں کئی افراد زخمی ہوئے ہیں اور کئی مسافر تو اب بھی ٹرین میں دبے یا پھنسے ہوئے ہیں۔ دراصل ٹکر کے بعد ٹرین کے کچھ ڈبوں کو شدید نقصان پہنچا ہے اور کچھ لوگ اسی میں پھنس گئے ہیں۔ حالانکہ راحت رسانی اور بچاؤکاری کا عمل جاری ہے۔ فائر بریگیڈ سروس کے اہلکار موقع پر پہنچ چکے ہیں زخمیوں کو قریبی اسپتالوں میں علاج کے لیے داخل کرایا گیا ہے۔
خبر رساں ایجنسی رائٹرس کے مطابق مقامی پولیس افسر سراج الاسلام نے مہلوکین کی تعداد میں اضافہ کا اندیشہ ظاہر کیا ہے۔ ان کا کہنا ہے کہ کچھ لوگوں کو حادثے میں سنگین چوٹیں آئی ہیں جنھیں فوری طور پر علاج مہیا کرایا گیا ہے۔ فی الحال راحت رسانی کا عمل جاری ہے اور زخمیوں کو اسپتال بھیجا جا رہا ہے۔ جائے حادثہ پر موجود لوگ متاثرہ ڈبے میں پھنسے لوگوں کو باہر نکالنے میں مدد کر رہے ہیں۔ ٹرین حادثہ کی جو تصویریں سامنے آئی ہیں اسے دیکھ کر اس کی شدت کا اندازہ لگایا جا سکتا ہے۔ ٹرین کی ایک بوگی پوری طرح سے پلٹی ہوئی نظر آ رہی ہے جس میں پھنسے لوگوں کو مقامی افراد نکالنے کی کوشش کر رہے ہیں۔
