شیخ حمد بن خلیفہ آل ثانی وہ رہنما جس نے قطر کو صحرا کی ایک چھوٹی ریاست سے عالمی طاقت میں بدل دیا

Shams Tabrez Qasmi

13 July 2026 (Publish: 09:18 AM IST)

0

شمس تبریز قاسمی

قطر کے سابق امیر شیخ حمد بن خلیفہ آل ثانی 12 جولائی 2026، بروز اتوار، اس دنیا سے رخصت ہو گئے۔ اپنی متعدد خوبیوں، دور اندیشی اور تاریخی خدمات کی وجہ سے انہوں نے عالمِ اسلام میں ایک منفرد مقام حاصل کیا اور وہ ہمیشہ یاد رکھے جائیں گے۔

ان کا سب سے بڑا کارنامہ یہ ہے کہ انہوں نے امتِ مسلمہ کے لیے میڈیا کی ضرورت اور اہمیت کو محسوس کیا اور 1996 میں الجزیرہ جیسا عظیم نیوز چینل قائم کیا، جو آج دنیا بھر کے مسلمانوں اور مظلوموں کی مضبوط آواز ہے اور دنیا کے چند معتبر، مستند اور بااثر میڈیا ہاؤسز میں شمار ہوتا ہے۔

ان کا دوسرا بڑا کارنامہ یہ ہے کہ جن تنظیموں اور شخصیات پر مختلف ممالک نے پابندیاں عائد کیں اور جن کے رہنماؤں کو اپنے ملکوں میں رہنے کی اجازت نہیں دی گئی، قطر نے انہیں پناہ دی۔ حماس اور اخوان المسلمون سے وابستہ کئی نمایاں رہنما قطر میں مقیم رہے، جبکہ حماس کا سیاسی دفتر بھی 2012 سے قطر میں موجود ہے۔

شیخ حمد بن خلیفہ آل ثانی کا ایک اور اہم کارنامہ یہ ہے کہ انہوں نے اپنے دورِ حکومت میں بلدیاتی (میونسپل) انتخابات متعارف کرائے اور خواتین کو ووٹ ڈالنے اور انتخابات میں حصہ لینے کا حق دیا، جو خلیجی خطے میں ایک اہم پیش رفت تھی۔

لیکن ان کا سب سے منفرد اور تاریخی کارنامہ یہ ہے کہ انہوں نے اپنی زندگی ہی میں رضاکارانہ طور پر اقتدار اپنے صاحبزادے کے سپرد کر دیا۔ دنیا کی تاریخ میں ایسی مثالیں بہت کم ملتی ہیں کہ کوئی حکمران اپنی زندگی میں اپنی مرضی سے اقتدار چھوڑ دے۔ عام طور پر حکمران آخری سانس تک اقتدار پر قائم رہتے ہیں، مگر شیخ حمد بن خلیفہ آل ثانی نے 2013 میں اپنے ولی عہد شیخ تمیم بن حمد آل ثانی کو، جو اس وقت صرف 31برس کے تھے، اقتدار سونپ دیا اور خود منصب سے دستبردار ہو گئے۔

1995 سے 2013 تک قطر کے امیر کی حیثیت سے انہوں نے ملک کو معاشی، سفارتی اور سیاسی اعتبار سے غیر معمولی ترقی دی۔ ان کے دور میں قطر نے ایل این جی (LNG) کے شعبے میں عالمی قیادت حاصل کی، خارجہ پالیسی کو زیادہ خودمختار بنایا اور ایک چھوٹے سے ملک کو عالمی سفارت کاری میں بااثر قوت کے طور پر منوایا۔ کئی علاقائی اور بین الاقوامی تنازعات میں قطر نے ثالثی کا کردار ادا کیا، جو آج بھی اس کی خارجہ پالیسی کی ایک نمایاں پہچان ہے۔

اللہ تعالیٰ شیخ حمد بن خلیفہ آل ثانی کی مغفرت فرمائے، ان پر اپنی بے پایاں رحمت نازل فرمائے، انہیں جنت الفردوس میں اعلیٰ مقام عطا فرمائے، اور موجودہ امیر شیخ تمیم بن حمد آل ثانی کو اپنے والد کے نقشِ قدم پر چلتے ہوئے امتِ مسلمہ اور قطر کی مزید خدمت کرنے کی توفیق عطا فرمائے۔ آمین۔