برطانیہ کی انسدادِ دہشت گردی پولیس نے ملک کے سب سے بڑے اسلامی اجتماعات میں سے ایک “یو کے اجتماع” کو مبینہ طور پر نشانہ بنانے کی دائیں بازو کی انتہاپسند دہشت گردی کی سازش کے شبہے میں 12 افراد کو گرفتار کر لیا ہے۔
تحقیقات کے مطابق مبینہ منصوبے کا ہدف 9 سے 12 جولائی تک سفوک کے علاقے شرب لینڈ ہال، بارہام میں منعقد ہونے والا چار روزہ اسلامی اجتماع تھا، جہاں تقریباً 15 ہزار افراد موجود تھے۔ ممکنہ سنگین خطرے کے پیش نظر پولیس نے منتظمین کو اجتماع مقررہ وقت سے پہلے ختم کرنے کا مشورہ دیا، جس کے بعد تمام شرکاء بحفاظت مقام سے روانہ ہو گئے۔
انسدادِ دہشت گردی پولیس لندن نے بتایا کہ یہ تحقیقات انتہاپسند دائیں بازو سے متعلق دہشت گردی کے شبہے کے تحت کی جا رہی ہیں اور ابتدائی شواہد سے ظاہر ہوتا ہے کہ ہدف یہی اسلامی اجتماع تھا۔
برطانوی وزیرِ داخلہ شبانہ محمود نے پارلیمان کو بتایا کہ پولیس کو اجتماع میں شریک افراد کی جانوں کو لاحق قابلِ اعتبار خطرے کی اطلاع ملی تھی، جس کے بعد سفوک پولیس، انسدادِ دہشت گردی یونٹس اور منتظمین نے فوری مشترکہ کارروائی کی۔
اتوار اور پیر کو سرے، گریٹر مانچسٹر، ایسیکس، اِپسوچ اور لندن کے مختلف علاقوں میں کارروائیاں کرتے ہوئے 11 مردوں اور ایک خاتون کو گرفتار کیا گیا۔ آٹھ افراد کو ٹیررازم ایکٹ 2000 کے تحت گرفتار کیا گیا، جبکہ تین دیگر افراد پر قتل کی سازش کا شبہ ظاہر کیا گیا ہے۔ ایک خاتون کو ملزم کی معاونت کے الزام میں حراست میں لیا گیا۔ بعد ازاں 82 سالہ ایک شخص کو ضمانت پر رہا کر دیا گیا، جبکہ دیگر 11 ملزمان پولیس کی تحویل میں ہیں۔
انسدادِ دہشت گردی پولیس کی سربراہ کمانڈر ہیلن فلاناگن نے کہا کہ پولیس نے خطرے کی اطلاع ملتے ہی فوری کارروائی کی۔ ان کے مطابق یہ خبر بالخصوص برطانوی مسلم برادری کے لیے تشویش کا باعث ہو سکتی ہے، کیونکہ پولیس کا ماننا ہے کہ مبینہ حملے کا ہدف ایک اسلامی اجتماع تھا۔
سفوک پولیس نے اتوار کو بڑا ہنگامی واقعہ (Major Incident) نافذ کر کے متعدد اداروں کے ساتھ مل کر تقریباً 15 ہزار شرکاء کے محفوظ انخلا کو یقینی بنایا۔ بعد ازاں پیر کو یہ ہنگامی حیثیت ختم کر دی گئی، تاہم علاقے میں پولیس کی اضافی نفری تعینات رکھی گئی ہے۔
پولیس نے واضح کیا ہے کہ تاحال کسی ملزم پر فردِ جرم عائد نہیں کی گئی اور تحقیقات جاری ہیں۔ اس کے ساتھ ہی پولیس کا کہنا ہے کہ موجودہ معلومات کی بنیاد پر اس کیس سے متعلق عوام کو کسی وسیع تر خطرے کا سامنا نہیں ہے۔
Support Independent Media
Click Here and Join the Membership of Millat Times to Support Independent Media.
Support Millat Times