آل انڈیا مسلم پرسنل لا بورڈ کا آئینی حقوق، مذہبی آزادی اور شریعت کے تحفظ کے لیے ملک گیر ’’تحریک تحفظ دستور و شریعت‘‘ شروع کرنے کا اعلان

mt-staff

31 August 2026 (Publish: 12:52 PM IST)

0

آل انڈیا مسلم پرسنل لا بورڈ نے ملک میں آئینی حقوق، مذہبی آزادی اور شریعت کے تحفظ کے لیے ملک گیر ’’تحریک تحفظ دستور و شریعت‘‘ شروع کرنے کا اعلان کیا ہے۔ بورڈ کی جانب سے 31 اگست 2026 کو جاری پریس بیان میں کہا گیا ہے کہ اس تحریک کے تحت ملک کے مختلف حصوں میں عوامی اجتماعات، احتجاجی پروگرام، قانونی آگاہی مہمات اور دیگر سرگرمیاں منعقد کی جائیں گی۔

بورڈ نے اپنے بیان میں کہا کہ ہندوستان کے تمام شہریوں کو مساوی حقوق، مذہبی آزادی، بنیادی آزادی، جان و مال کے تحفظ اور عزت و وقار کی ضمانت دینا ریاست کی ذمہ داری ہے، لیکن گزشتہ چند برسوں کے دوران ملک میں ایسے حالات پیدا ہوئے ہیں جن سے خصوصاً مسلمانوں کے مذہبی، سماجی اور شہری حقوق متاثر ہوئے ہیں۔

آل انڈیا مسلم پرسنل لا بورڈ نے کہا کہ یکساں سول کوڈ، وقف قوانین، مساجد اور دیگر مذہبی مقامات سے متعلق مسائل، نوجوانوں کے خلاف کارروائیاں اور دیگر اقدامات مسلمانوں کے آئینی اور مذہبی حقوق کے حوالے سے سنجیدہ چیلنجز پیدا کر رہے ہیں، جن پر توجہ دینا ضروری ہے۔

بورڈ کے مطابق انہی حالات کے پیش نظر حقوق کے تحفظ، مذہبی آزادی اور آئینی اقدار کے دفاع کے لیے منظم تحریک چلانے کا فیصلہ کیا گیا ہے۔ بورڈ نے واضح کیا کہ ’’تحریک تحفظ دستور و شریعت‘‘ پرامن، جمہوری اور آئینی طریقے سے چلائی جائے گی۔

تحریک کے تحت ملک کے مختلف حصوں میں عوامی اجتماعات اور احتجاجی پروگرام منعقد کیے جائیں گے، جن میں مذہبی، سماجی اور سیاسی شخصیات کو خطاب کے لیے مدعو کیا جائے گا۔

اس کے علاوہ مسلمانوں کے خلاف پیش آنے والے واقعات اور انسانی حقوق کی خلاف ورزیوں سے متعلق ایک جامع وائٹ پیپر تیار کرکے عوام، مختلف تنظیموں، دانشوروں اور سیاسی نمائندوں تک پہنچایا جائے گا۔

بورڈ شہریوں کو ان کے آئینی اور قانونی حقوق سے آگاہ کرنے کے لیے ایک قانونی رہنما کتابچہ بھی تیار کرے گا، جس میں مذہبی آزادی، عبادت گاہوں اور دیگر متعلقہ حقوق کے تحفظ سے متعلق قانونی معلومات فراہم کی جائیں گی۔

تحریک میں ہجومی تشدد کے خلاف بھی مہم چلانے کا اعلان کیا گیا ہے۔ بورڈ حکومت سے مطالبہ کرے گا کہ شہریوں کی جان و مال کے تحفظ اور ہجومی تشدد کے واقعات کی روک تھام کے لیے مؤثر قانونی اقدامات کیے جائیں۔

اس کے ساتھ ملک کے مختلف علاقوں میں مقامی سطح پر مطالبات کے منشور بھی تیار کیے جائیں گے، جن میں مذہبی آزادی، شہری حقوق، عبادت گاہوں کے تحفظ اور آئینی ضمانتوں سے متعلق مطالبات شامل ہوں گے۔

آل انڈیا مسلم پرسنل لا بورڈ نے عوام سے اپیل کی ہے کہ وہ اس تحریک میں پرامن اور منظم انداز میں شریک ہوں اور آئین، مذہبی آزادی، مساوی حقوق اور شریعت کے تحفظ کے لیے اجتماعی طور پر جدوجہد کریں۔