مصری صدر عبدالفتاح السیسی نے واضح کیا ہے کہ آزاد فلسطینی ریاست کے قیام اور اسرائیلی قبضے کے خاتمے کے بغیر اسرائیل کے ساتھ عوامی سطح پر تعلقات معمول پر نہیں آ سکتے۔
مصر کے نئے انتظامی دارالحکومت میں اسٹیٹ اسٹریٹجک کمانڈ کے افتتاح کے موقع پر خطاب کرتے ہوئے صدر السیسی نے کہا کہ خطے میں نہ دیرپا امن قائم ہو سکتا ہے، نہ حقیقی استحکام آ سکتا ہے اور نہ ہی اسرائیل کے ساتھ عوامی سطح پر تعلقات معمول پر آ سکتے ہیں، جب تک ایسا منصفانہ امن قائم نہ ہو جو اسرائیلی قبضے کا خاتمہ کرے، ناانصافی اور جارحیت کو روکے، فلسطینی عوام کے حقوق بحال کرے اور تمام فریقوں کے لیے سلامتی کی ضمانت فراہم کرے۔
انہوں نے کہا کہ منصفانہ امن ہی مشرقِ وسطیٰ کے عوام کو امن، استحکام اور خوشحالی کے ساتھ زندگی گزارنے کا موقع فراہم کر سکتا ہے۔
صدر السیسی نے غزہ میں اکتوبر 2025 سے نافذ جنگ بندی کو برقرار رکھنے کی ضرورت پر بھی زور دیا اور ایران اور امریکہ کے درمیان حالیہ مفاہمتی فریم ورک کا خیرمقدم کرتے ہوئے کہا کہ ایسی کوششوں کو کمزور کرنے کی ہر کوشش کو روکنا ضروری ہے۔
اپنے خطاب میں انہوں نے نئے اسٹیٹ اسٹریٹجک کمانڈ مرکز کو مصر کی دفاعی اور انتظامی صلاحیتوں میں ایک اہم پیش رفت قرار دیتے ہوئے کہا کہ یہ جدید ٹیکنالوجی، محفوظ مواصلاتی نظام، انٹیلی جنس صلاحیتوں اور سیاسی و عسکری قیادت کے درمیان مربوط رابطے سے آراستہ ہے، جو غیر معمولی حالات اور قومی چیلنجز سے نمٹنے میں کلیدی کردار ادا کرے گا۔
Support Independent Media
Click Here and Join the Membership of Millat Times to Support Independent Media.
Support Millat Times