نئی دہلی: جھارکھنڈ کے چترا ضلع میں ایک مسلم شخص کو ہجوم نے مبینہ طور پر پیٹ پیٹ کر قتل کردیا، جبکہ پولیس کا کہنا ہے کہ اس پر لگائے گئے جنسی زیادتی کے الزام کی ابھی تصدیق نہیں ہوئی ہے اور معاملہ زیر تفتیش ہے۔واقعہ منگل کے روز پیش آیا، جہاں دیہی افراد کی بڑی تعداد نے مبینہ طور پر محمد امروز کے گھر کو گھیر لیا۔ بتایا گیا کہ ایک کم عمر لڑکی کے لاپتہ ہونے کے بعد واپس آنے اور امروز پر اسے قید رکھنے اور جنسی زیادتی کا الزام لگانے کے بعد یہ ہجوم جمع ہوا۔پولیس نے اس معاملے میں دو الگ الگ تحقیقات شروع کی ہیں۔ ایک تحقیق کم عمر لڑکی کے الزامات سے متعلق ہے، جبکہ دوسری ہجومی تشدد کے واقعے کی جا رہی ہے، جس میں امروز کی جان گئی۔
پولیس کے مطابق لڑکی کو طبی معائنے کے لیے بھیجا گیا ہے اور رپورٹ کا انتظار کیا جا رہا ہے تاکہ الزامات کی حقیقت کا تعین کیا جاسکے۔ پولیس نے لڑکی کے بیان کی بنیاد پر بچوں کے تحفظ کے قوانین کے تحت مقدمہ درج کیا ہے، تاہم واضح کیا ہے کہ تحقیقات ابھی مکمل نہیں ہے ۔ امروز کے والد کی جانب سے درج کرائی گئی شکایت کے مطابق تقریباً 100 سے 150 افراد پر مشتمل ہجوم گھر میں داخل ہوا اور خاندان پر لڑکی کو چھپانے کا الزام لگایا۔ شکایت میں الزام عائد کیا گیا ہے کہ ہجوم نے امروز کے والدین کو باندھ دیا اور جب امروز نے مداخلت کی تو اسے لاٹھیوں اور پتھروں سے نشانہ بنایا گیا۔ جاری ہیں۔
شکایت میں یہ بھی دعویٰ کیا گیا ہے کہ حملے کے وقت پولیس اہلکار موقع پر موجود تھے۔ امروز کو بعد میں پولیس تحویل میں لے جایا گیا، جہاں اہل خانہ کو بتایا گیا کہ علاج کے دوران اس کی موت ہوگئی۔
امروز کے والد نے اپنی شکایت میں 56 افراد کو نامزد کیا ہے اور الزام لگایا ہے کہ حملے کی ویڈیوز بنائی گئیں اور انہیں سوشل میڈیا پر پھیلایا گیا۔
پولیس نے بتایا ہے کہ ہجومی قتل کے معاملے میں کئی مشتبہ افراد کو حراست میں لیا گیا ہے، جبکہ علاقے میں مزید سکیورٹی فورس تعینات کردی گئی ہیں تاکہ کسی بھی ممکنہ کشیدگی کو روکا جاسکے۔
جنسی زیادتی کے الزام اور ہجومی قتل کی تحقیقات الگ الگ کی جا رہی ہیں۔ پولیس نے واضح کیا ہے کہ امروز کے خلاف الزام ابھی ثابت نہیں ہوا، جبکہ ہجوم میں شامل افراد کے خلاف قانون کے مطابق کارروائی کی جائے گی
Support Independent Media
Click Here and Join the Membership of Millat Times to Support Independent Media.
Support Millat Times