آزاد صحافت اور تازہ خبروں کے لیے ملت ٹائمز ایپ سے جڑیں۔
ایپ انسٹال ہے تو کھلے گی، ورنہ Google Play کھلے گا۔ریاست میں مسلمانوں کے 13.48 لاکھ ووٹروں کے نام فہرست سے خارج، غیر مسلم ووٹروں کے 86 لاکھ نام حذف؛ بنگلورو میں غیر مسلم ووٹروں کی زیادہ کٹوتی، باقی ریاست میں مسلمانوں کی شرحِ کٹوتی زیادہ رہی
کرناٹک میں ووٹر فہرستوں کی خصوصی جامع نظرثانی (ایس آئی آر) کے بعد مسلم ووٹروں کی تعداد میں 18.84 فیصد کمی ہوئی ہے۔ اس دوران 13.48 لاکھ مسلم ووٹروں کے نام فہرست سے خارج کیے گئے، جبکہ غیر مسلم ووٹروں کی تعداد میں بھی 17.79 فیصد یعنی تقریباً 86 لاکھ کی کمی درج کی گئی۔
ایس آئی آر سے پہلے کرناٹک میں مجموعی ووٹروں کی تعداد 5.54 کروڑ تھی، جو نظرثانی کے بعد گھٹ کر 4.55 کروڑ رہ گئی۔ مسلم ووٹروں کی تعداد 71.56 لاکھ سے کم ہوکر 58.08 لاکھ ہوگئی، جبکہ غیر مسلم ووٹروں کی تعداد 4.82 کروڑ سے گھٹ کر 3.96 کروڑ رہ گئی۔ اس طرح ریاست کے مجموعی ووٹروں میں مسلمانوں کا تناسب 12.91 فیصد سے کم ہوکر 12.77 فیصد رہ گیا۔
مذہب کی بنیاد پر ووٹروں کے یہ اعداد و شمار سیاسی تحقیقاتی ادارے سنکلپ کی جانب سے تیار کیے گئے ہیں، کیونکہ انتخابی فہرستوں میں ووٹروں کا مذہب درج نہیں ہوتا، اس لیے یہ اعداد و شمار تخمینی ہیں۔
رپورٹ کے مطابق بنگلورو اور ریاست کے دیگر علاقوں کے درمیان فرق سامنے آیا ہے۔ بنگلورو کی 28 اسمبلی نشستوں پر غیر مسلم ووٹروں کی کٹوتی کی شرح مسلمانوں کے مقابلے زیادہ رہی، جبکہ باقی 196 اسمبلی حلقوں میں مسلم ووٹروں کے نام زیادہ تناسب سے حذف کیے گئے۔
بنگلورو میں مجموعی ووٹروں کی تعداد 1.03 کروڑ سے گھٹ کر 59.08 لاکھ رہ گئی۔ مسلم ووٹروں کی تعداد 13.67 لاکھ سے کم ہوکر 9.06 لاکھ ہوگئی، یعنی 33.72 فیصد کمی ہوئی۔ دوسری جانب غیر مسلم ووٹروں کی تعداد 89 لاکھ سے گھٹ کر 50 لاکھ رہ گئی، جو 43.82 فیصد کمی ہے۔
ریاست کے باقی 196 اسمبلی حلقوں میں مسلم ووٹروں کی تعداد 57.89 لاکھ سے کم ہوکر 49.02 لاکھ رہ گئی، یعنی 15.32 فیصد کمی ہوئی۔ اس کے مقابلے میں غیر مسلم ووٹروں کی تعداد 3.94 کروڑ سے گھٹ کر 3.46 کروڑ ہوگئی، جو 12.18 فیصد کمی ہے۔
اس سے پہلے 24 اگست کو جاری کی گئی ابتدائی ووٹر فہرست میں الیکشن کمیشن نے 1,07,96,339 ووٹروں کو غیر حاضر، منتقل شدہ، فوت شدہ، ڈپلیکیٹ اور دیگر زمروں میں شامل کرکے خارج کیا تھا۔ ان میں 15.43 لاکھ مسلم اور 92.32 لاکھ غیر مسلم ووٹر شامل تھے۔
ان میں سے بعض ووٹروں کے نام فارم 6 کے ذریعے دوبارہ حتمی فہرست میں شامل کیے گئے، جبکہ 18 سال کی عمر مکمل کرنے والے نئے ووٹروں کے نام بھی درج ہوئے۔ جن اہل ووٹروں کے نام حتمی فہرست میں شامل نہیں ہیں، وہ فارم 6 کے ذریعے اندراج کراسکتے ہیں۔ الیکشن کمیشن کے نئے فیصلے کے تحت فارم 6 کے ساتھ ایس آئی آر کا اعلامیہ فارم جمع کرانا ضروری نہیں ہے۔
ایس آئی آر کے انتخابی اثرات کا جائزہ لینے کے لیے 2024 کے لوک سبھا انتخابات کے نتائج کو بھی بنیاد بنایا گیا۔ جن پولنگ بوتھوں پر کسی جماعت کو 60 فیصد یا اس سے زیادہ ووٹ ملے تھے، انہیں اس جماعت کے مضبوط بوتھ قرار دیا گیا۔
رپورٹ کے مطابق کرناٹک کے 224 اسمبلی حلقوں میں سے 39 ایسے حلقوں کی نشاندہی کی گئی، جہاں کانگریس کے مضبوط بوتھوں پر حذف کیے گئے ووٹروں کی تعداد متعلقہ حلقے میں مجموعی کٹوتی کے 35 فیصد سے زیادہ تھی۔
ان 39 حلقوں میں سے 26 پر کانگریس، 11 پر بی جے پی اور دو پر جنتا دل (سیکولر) کے ارکان اسمبلی ہیں۔ ان حلقوں میں حذف کیے گئے مجموعی ناموں میں 42 فیصد کانگریس کے مضبوط بوتھوں سے تعلق رکھتے تھے۔
مسلم ارکان اسمبلی کے 10 حلقوں میں 2.10 لاکھ ووٹر کم
کرناٹک اسمبلی میں مسلم برادری کے 10 ارکان اسمبلی ہیں، جن میں رضوان ارشد، این اے حارث، بی زیڈ ضمیر احمد خان، ایچ اے اقبال حسین، تنویر سیٹھ، یو ٹی قادر، یاسر احمد خان پٹھان، آصف (راجو) سیٹھ، رحیم خان اور کنیز فاطمہ شامل ہیں۔
ان 10 اسمبلی حلقوں میں ایس آئی آر سے پہلے مسلم ووٹروں کی تعداد 9.62 لاکھ تھی، جو نظرثانی کے بعد گھٹ کر 7.52 لاکھ رہ گئی۔ اس طرح ان حلقوں میں 2.10 لاکھ مسلم ووٹروں کی کمی ہوئی۔
کرناٹک کی ووٹر فہرستوں میں 716 غیر ملکی شہریوں کے نام
ایس آئی آر کے مقاصد میں انتخابی فہرستوں سے غیر ملکی شہریوں کے نام خارج کرنا بھی شامل تھا۔ کرناٹک کے چیف الیکٹورل آفیسر کے دفتر کے ذرائع کے مطابق، ریاست کی ووٹر فہرستوں میں 716 غیر ملکی شہریوں کے نام پائے گئے۔
ان میں 641 کا تعلق نیپال سے تھا، جبکہ پاکستان اور بنگلہ دیش سے تعلق رکھنے والا ایک ایک شہری بھی ووٹر فہرست میں درج پایا گیا۔
Support Independent Media
Click Here and Join the Membership of Millat Times to Support Independent Media.
Support Millat Times