آزاد صحافت اور تازہ خبروں کے لیے ملت ٹائمز ایپ سے جڑیں۔
ایپ انسٹال ہے تو کھلے گی، ورنہ Google Play کھلے گا۔ساؤتھ ایشیا جسٹس کمپین کی رپورٹ میں انکشاف؛ ریاستی اداروں کے ہاتھوں 8 مسلمان ہلاک، ہندو انتہا پسندوں اور دیگر غیر ریاستی عناصر کے ہاتھوں بھی 8 افراد قتل؛ اتر پردیش میں سب سے زیادہ 103 واقعات درج
ہندوستان میں مسلمانوں کے خلاف تشدد اور نفرت انگیز کارروائیوں میں مسلسل اضافہ ہورہا ہے۔ اگست سے اکتوبر 2026 کے درمیان تین ماہ کے دوران کم از کم 16 مسلمانوں کو قتل کردیا گیا۔ ان میں سے 8 افراد ریاستی اداروں کے ہاتھوں مارے گئے، جبکہ 8 دیگر مسلمانوں کو گئو رکشکوں اور دوسرے غیر ریاستی عناصر نے قتل کیا۔ یہ انکشاف ساؤتھ ایشیا جسٹس کمپین کے انڈیا پرسی کیوشن ٹریکر (India Persecution Tracker) کی 2026 کی تیسری سہ ماہی کی رپورٹ میں کیا گیا ہے۔
رپورٹ کے مطابق، ریاستی اداروں کے ہاتھوں مارے گئے 8 مسلمانوں میں سے 3 پولیس مقابلوں میں ہلاک ہوئے، جبکہ 5 کی موت پولیس حراست یا جیل میں ہوئی۔ اس کے ساتھ 2026 میں ریاستی اداروں کے ہاتھوں مسلمانوں کی ہلاکتوں کی تعداد کم از کم 27 ہوگئی ہے۔
دوسری جانب اگست سے اکتوبر کے درمیان چار ریاستوں میں گئو رکشکوں اور دیگر غیر ریاستی عناصر کے ہاتھوں 8 مسلمانوں کا قتل بھی ریکارڈ کیا گیا۔ مغربی بنگال اور اتر پردیش میں سب سے زیادہ تین تین مسلمان قتل ہوئے۔ 2022 میں اس ٹریکر کے ذریعے واقعات کا ریکارڈ رکھنا شروع کیے جانے کے بعد 2026 ایسے قتل کے واقعات کے لحاظ سے سب سے مہلک سال بن چکا ہے، جبکہ سال کے ابھی دو ماہ باقی ہیں۔
اتر پردیش میں مسلمانوں کے خلاف 103 واقعات
رپورٹ میں درج 146 واقعات میں سے 103 اتر پردیش میں پیش آئے۔ رپورٹ کے مطابق، اسمبلی انتخابات کے قریب آتی ریاست میں مسلمانوں کے خلاف تشدد کے ساتھ سخت گیر پولیس کارروائیوں اور مسلم مخالف بیانات کو بھی فروغ ملا۔
اتر پردیش پولیس نے گئو کشی اور مویشیوں سے متعلق کارروائیوں کے نام پر 100 سے زائد مسلم نوجوانوں کو گولیاں ماریں۔ ریاست میں ریکارڈ کی گئی نفرت انگیز تقاریر میں سے تقریباً نصف وزیر اعلیٰ یوگی آدتیہ ناتھ کی جانب سے کی گئیں۔
اکتوبر میں جاری ریاستی پولیس کے اعداد و شمار کے مطابق، 2017 سے اب تک اتر پردیش میں پولیس مقابلوں میں مارے گئے 316 افراد میں سے 110 مسلمان تھے۔ یہ مجموعی تعداد کا تقریباً 35 فیصد ہے، جبکہ ریاست کی آبادی میں مسلمانوں کا تناسب تقریباً 19 فیصد ہے۔
اگست سے اکتوبر کے دوران پولیس نے کم از کم 118 مسلم نوجوانوں کو نام نہاد نصف مقابلوں میں گولیاں مار کر زخمی کیا۔ ان میں 105 واقعات اتر پردیش میں پیش آئے۔ ان کارروائیوں میں عموماً باضابطہ گرفتاری سے پہلے نوجوانوں کی ٹانگوں میں گولی ماری جاتی ہے۔ ان میں سے بیشتر پر مویشیوں سے متعلق مقدمات درج تھے۔
رپورٹ میں ایسوسی ایٹڈ پریس کی گزشتہ ماہ شائع ہونے والی ایک تحقیق کا بھی حوالہ دیا گیا ہے، جس کے مطابق 2020 سے اتر پردیش پولیس نے گائے کی اسمگلنگ کے معاملات میں تقریباً 650 افراد کو گولی ماری، جن میں شناخت کیے گئے افراد میں تقریباً 93 فیصد مسلمان تھے۔
ایسی کارروائیوں میں شامل پولیس اہلکاروں کو انعامات بھی دیے جاتے رہے۔ 13 اگست کو الٰہ آباد ہائی کورٹ نے ایسے ہی ایک معاملے میں مرکزی تحقیقات کا حکم دیتے ہوئے کہا تھا کہ کارروائی میں شامل تمام 23 پولیس اہلکاروں کو ان کے ’اچھے کام‘ کے لیے انعام دیا گیا تھا۔
انتخابی ریاستوں میں مسلم مخالف نفرت انگیز تقاریر میں اضافہ
رپورٹ کے مطابق، کم از کم 10 ریاستوں میں مسلمانوں پر حملوں کے درجنوں واقعات پیش آئے۔ ان حملوں کے دوران مسلمانوں کو زبردستی ’جے شری رام‘ کے نعرے لگانے پر مجبور کرنے اور مذہبی بنیاد پر ذلیل کرنے کے واقعات بھی شامل تھے۔ مغربی بنگال میں عیسائی برادری کو بھی نشانہ بنایا گیا۔
بنگالی زبان بولنے والے مسلمانوں کو ووٹ کے حق سے محروم کرنے اور انہیں ملک سے بے دخل کرنے کی کارروائیاں بھی جاری رہیں۔ ان مسلمانوں کو اکثر بنگلہ دیش سے آئے غیر قانونی تارکین وطن قرار دیا جاتا ہے۔
اکتوبر کے وسط تک 18 ریاستوں اور مرکز کے زیر انتظام علاقوں میں ایس آئی آر کے تیسرے مرحلے کے تحت ابتدائی ووٹر فہرستوں سے 6.1 کروڑ سے زیادہ نام حذف کیے جاچکے تھے۔ بہار میں 2025 سے شروع ہونے والے اس عمل کے بعد ملک بھر میں حذف کیے گئے ناموں کی مجموعی تعداد 13.3 کروڑ سے تجاوز کرگئی۔
کم از کم پانچ ریاستوں میں فارم 7 کے ذریعے اجتماعی اعتراضات داخل کیے گئے، جن کا مقصد مسلم ووٹروں کے نام انتخابی فہرستوں سے خارج کرانا تھا۔ مغربی بنگال میں ستمبر کے وسط تک اپیل ٹریبونلز 38.3 لاکھ اپیلوں میں سے صرف 1,26,194 کا فیصلہ کرپائے تھے، جس کے باعث ووٹر فہرست سے نام خارج ہونے والے افراد کے پاس مؤثر قانونی چارہ جوئی کا راستہ محدود رہا۔
13 ستمبر کو وزیر داخلہ امیت شاہ نے کہا تھا کہ حکومت اپنے اتحادیوں کے ساتھ ملک گیر این آر سی کے نفاذ پر بات چیت کررہی ہے، تاکہ ہر غیر قانونی درانداز کی شناخت کرکے اسے ملک سے باہر نکالا جاسکے۔
وزارت داخلہ کی آبادیاتی تبدیلی سے متعلق ایک کمیٹی نے ریاستوں سے گزشتہ 15 برسوں کے مذہب کے اعتبار سے پیدائش، اسکولوں میں داخلے، جائیداد کے لین دین اور مذہبی مقامات کے اعداد و شمار طلب کیے۔ کمیٹی کی شرائط میں غیر قانونی نقل مکانی، حراست اور ملک بدری جیسے معاملات بھی شامل ہیں۔ اکتوبر کے وسط تک کمیٹی نے ایک پورٹل بھی شروع کردیا تھا، جس کے ذریعے لوگوں سے آبادیاتی تبدیلی کے ثبوت طلب کیے گئے۔
2027 کی مردم شماری کے سوال نامے میں بھی ہر فرد سے اس کے والدین کے نام، تاریخ اور جائے پیدائش کے علاوہ مذہب سے متعلق معلومات طلب کی جائیں گی۔ رپورٹ میں اس پر تشویش ظاہر کی گئی ہے کہ والدین کی تفصیلات جمع کرنے سے شہریت کے تعین کے معاملات بھی متاثر ہوسکتے ہیں، خصوصاً ایسے وقت میں جب حکومت ملک گیر این آر سی پر غور کررہی ہے۔
مسلمانوں کی ملک بدری اور بے دخلی کی کارروائیاں بھی تیز
رپورٹ کے مطابق، مسلمانوں کی ملک بدری کے واقعات میں بھی اضافہ ہوا ہے۔ اگست کے اختتام تک ممبئی پولیس نے 2026 میں 1,066 افراد کو بنگلہ دیشی شہری قرار دے کر ملک بدر کرنے کا دعویٰ کیا تھا۔ یہ تعداد پورے 2025 میں ملک بدر کیے گئے افراد سے بھی زیادہ تھی۔
ایک اہم معاملے میں گوہاٹی ہائی کورٹ نے آسام حکومت کو دو خواتین کے اہل خانہ کو معاوضہ ادا کرنے کا حکم دیا۔ ان خواتین کو زبردستی سرحد پار کرکے بنگلہ دیش بھیج دیا گیا تھا اور وہ اب تک لاپتہ ہیں۔
چار بی جے پی وزرائے اعلیٰ کے مسلم مخالف بیانات کا ذکر
رپورٹ میں اتر پردیش، مغربی بنگال، آسام اور اتراکھنڈ کے چار بی جے پی وزرائے اعلیٰ کے مسلم مخالف بیانات کا بھی ذکر کیا گیا ہے۔
ساؤتھ ایشیا جسٹس کمپین کے الیکشن واچ کے مطابق، اگست سے اکتوبر کے درمیان اتر پردیش میں کم از کم 29 مسلم مخالف نفرت انگیز تقاریر ریکارڈ کی گئیں، جن میں سے 13 وزیر اعلیٰ یوگی آدتیہ ناتھ نے کیں۔ 7 اکتوبر کو انہوں نے آنے والے انتخابات کو ’80 بمقابلہ 20‘ کا مقابلہ قرار دیا تھا، جسے ریاست میں مسلمانوں کی آبادی کے تناسب کی جانب اشارہ سمجھا گیا۔
آسام کے وزیر اعلیٰ ہیمنت بسوا شرما نے یکم اکتوبر کو ایک ضمنی انتخابی ریلی میں مسلم کانگریس رکن پارلیمنٹ کو جواب دیتے ہوئے کہا تھا کہ جو ماں کا دودھ پینے کے لیے پیدا ہوئے ہیں وہ انسان ہیں، جبکہ بریانی کھانے کے لیے پیدا ہونے والے جانور ہیں۔
اتراکھنڈ کے وزیر اعلیٰ پشکر سنگھ دھامی نے 29 اگست کو ہلدوانی میں کہا تھا کہ بی جے پی حکومت کسی مولوی یا مولانا سے نہیں ڈرتی اور ریاست کی آبادی کا تناسب تبدیل نہیں ہونے دیا جائے گا۔ انہوں نے تبدیلی مذہب، تجاوزات اور ’جہاد‘ کو برداشت نہ کرنے کی بات بھی کہی تھی۔ 6 اکتوبر کو ایس آئی آر کا دفاع کرتے ہوئے انہوں نے سوال کیا تھا کہ کیا دراندازوں کو ووٹ دینے کا حق ملنا چاہیے؟
مساجد اور مدارس کے خلاف کارروائیاں، چھ ریاستوں میں مسماری
رپورٹ میں کہا گیا ہے کہ بی جے پی حکومت والی ریاستوں میں مسلمانوں کو خارج کرنے کے لیے قانونی اور انتظامی اقدامات کا دائرہ وسیع ہوا ہے۔ صرف ستمبر میں چار ریاستوں کی کم از کم چھ مساجد کو مکمل یا جزوی طور پر منہدم کیا گیا۔
مغربی بنگال میں نئی حکومت نے 252 مدارس بند کرنے کا حکم دیا، جبکہ 5,299 لاؤڈ اسپیکر ہٹائے گئے۔ وزیر اعلیٰ کے اپنے اعداد و شمار کے مطابق، ان میں تقریباً 4,200 لاؤڈ اسپیکر مساجد سے ہٹائے گئے تھے۔
چھتیس گڑھ اور مہاراشٹر میں تبدیلی مذہب مخالف قوانین نافذ ہوئے، جبکہ گجرات اور آسام میں یکساں سول کوڈ سے متعلق بلوں کو صدر جمہوریہ کی منظوری مل گئی۔ رپورٹ کے مطابق، ان قوانین کے نفاذ سے مسلم پرسنل لا متاثر ہوگا۔
آسام میں اکتوبر کے وسط میں تین اضلاع میں 1,100 سے زیادہ خاندانوں کو بے دخل کیا گیا، جن میں زیادہ تر بنگالی زبان بولنے والے مسلمان تھے۔ نیو ہیومینٹیرین کی ایک تحقیق کے مطابق، وزیر اعلیٰ ہیمنت بسوا شرما کے 2021 میں اقتدار سنبھالنے کے بعد سے ریاست میں کم از کم 33 بے دخلی مہمات کے نتیجے میں 20,387 خاندان بے گھر ہوچکے ہیں۔
Support Independent Media
Click Here and Join the Membership of Millat Times to Support Independent Media.
Support Millat Times