نئی دہلی(ملت ٹائمزپریس ریلیز)
معہد الطیب نبی کریم کے طالبات کی انجمن بزم عائشہ کا آج تقریری مسابقہ ہوا ،جس میں معہد کی طالبات نے بڑھ چڑھ کر حصہ لیا اور مختلف موضوعات پر تقریر کی ۔ صائمہ ،حمیرا، خدیجہ اور شائقہ وغیرہ کوبہترین تقریر کرنے اور نمایاںنمبرات حاصل کرنے کی وجہ سے خصوصی انعامات سے نوازا گیا جبکہ دیگر طالبات کو بھی تشجیعی انعام سے نوازاگیا ۔ مذکورہ لڑکیوں کے علاوہ سامعہ پروین،شمع پروین،عفت پروین،ریشمابانو،یاسمین پرویز،درخشاں ،رقیہ پروین،زینب پروین،فضا ئ،ثنا، گلستاں ،ام حبیبہ ،فاکہین،ثامین وغیرہ نے بھی نے حصہ لیا ۔ اس موقع پر حکم کا فریضہ ملت ٹائمز کے ایڈیٹر شمس تبریز قاسمی نے انجام دیا ۔
مسابقہ کے اختتام پر طالبات کو خطاب کرتے ہوئے شمس تبریز قاسمی نے کہاکہ تحریر وتقریر کی صلاحیت سے آراستہ ہونا اور ان فنون میں مہارت حاصل کرنا وقت کی اہم ضرورت ہے ،زبان وقلم کے ماہرین نے ہردورمیں انقلاب برپا کیا ہے اور کسی بھی تحریک کی کامیابی میں ان چیزوں کا نمایاں دخل ہوتاہے ،جو شخص اچھی اور شگفتہ گفتگو کرنے پر قدرت رکھتاہے وہ ہر قدم پر کامیا ب ہوتاہے اور زندگی کے مختلف شعبوں میں وہ اس کا فائدہ اٹھاتاہے ،شمس تبریز قاسمی نے مزیدکہاکہ مسلم بچیوں کا صحافت وخطابت میں دلچسپی دکھانا لائق صدتحسین ہے ،ان بچیوں کو کل ہوکر ملت کی ترجمانی کرنی ہے ،ٹی وی چیلنوں پر،مباحثوں اور مختلف پروگراموں میں انہیں اسلام کی صحیح تصویر پیش کرنی ہے آج اگر ان کی صحیح تربیت کی جائے گی انہیں تقریر کرنے اور لکھنے کے طریقوں کو بتلایاجائے گا تو یہ مزید بہتر انداز میں ان فرائض کو انجام دیں گی۔انہوں نے ادارہ کے ناظم مولانا عامر ظفر قاسمی کو اس اہم اقدام کیلئے مبارکباد پیش کی۔ نظامت کا فریضہ معہد الطیب کے مہتمم مولانا عامر ظفر قاسمی نے انجام دیا ۔مسابقہ میں جناب معروف صاحب ،ممتاز صاحب سمیت متعدد لوگ مہمان خصوصی کی حیثیت سے شریک تھے۔
