لکھنو (ایم این این )
اتر پردیش میں ترقی اور اچھے کاموں کا دعویٰ وزیر اعلیٰ یوگی آدتیہ ناتھ بھلے ہی خوب کرتے ہوں، لیکن بی جے پی کے مرکزی وزیر نتن گڈکری اس بات کو درست نہیں مانتے۔ ایک عوامی تقریب کے دوران اس تعلق سے انھوں نے یوگی حکومت پر طنز بھی کیا اور کہا کہ یہاں کی بسوں میں ہارن کے علاوہ سب کچھ بجتا ہے۔
دراصل مرکزی وزیر برائے ٹرانسپورٹیشن نتن گڈکری بی جے پی کے لیے انتخابی تشہیر کرنے یو پی کے بلیا پہنچے تھے۔ اس دوران ایک جلسہ کو خطاب کرتے ہوئے نتن گڈکری نے کہا کہ اتر پردیش کی بس ایسی ہیں جن میں ہارن کے علاوہ سب بجتا ہے۔ گڈکری نے یو پی کے محکمہ ٹرانسپورٹیشن کی بسوں کا موازنہ مہاراشٹر حکومت کی بسوں سے کرتے ہوئے کہا کہ ہمارے یہاں بس یو پی کی بس جیسی نہیں ہیں۔ ہمارے ناگپور میں 35 ائیر کنڈیشنر بسیں ہیں جو اتھنال سے چلتی ہیں۔
یہ کوئی پہلا واقعہ نہیں ہے جب نتن گڈکری نے اپنی ہی پارٹی کے لیڈر اور پی ایم مودی پر حملہ کیا ہے۔ اس سے پہلے کئی بار اشاروں اشاروں میں حملہ کر چکے ہیں۔ انھوں نے کہا تھا کہ صرف اچھا بولنے سے کوئی الیکشن نہیں جیت سکتا۔ حال ہی میں نتن گڈکری نے تین ریاستوں میں بی جے پی کی شکست کے بارے میں کہا تھا کہ ”کامیابی کے تو کئی دعویدار ہوتے ہیں لیکن ناکامی یتیم ہوتی ہے۔ جہاں کامیابی ہے، وہاں سہریٰ لینے والوں کی بھیڑ لگی ہوتی ہے، لیکن شکست میں ہر کوئی ایک دوسرے پر انگلی اٹھانے لگتا ہے۔“
اتنا ہی نہیں، نتن گڈکری نے ہندوستانی فضائیہ کے ذریعہ پاکستان میں گھس کر دہشت گرد کیمپوں پر کیے گئے ائیر اسٹرائیک پر بھی اپنی پارٹی کو نصیحت دی تھی۔ انھوں نے کہا تھا کہ دہشت گردوں کے خلاف ہندوستانی فضائیہ کی کارروائی کو عام انتخاب سے نہیں جوڑا جانا چاہیے اور نہ ہی کسی کو اس کا سیاسی فائدہ یا سہریٰ لینا چاہیے۔
اس کے علاوہ ممبئی میں منعقد ایک تقریب میں مرکزی وزیر نتن گڈکری نے پی ایم مودی کو اشاروں اشاروں میں نشانہ بنایا تھا۔ انھوں نے کہا تھا کہ ”خواب دکھانے والے لیڈر لوگوں کو اچھے لگتے ہیں، لیکن دکھائے ہوئے خواب اگر پورے نہیں کیے جائیں تو عوام ان کی پٹائی بھی کرتی ہے۔ اس لیے خواب وہی دکھاو جو پورے ہو سکیں۔“
