نئی دہلی(ملت ٹائمزعارفہ حیدر خان)
ڈیرہ سچا سواد کے سربراہ گرو رام رہیم سنگھ کو ریپ کا مجرم قرار دیتے ہوئے بیس سال قید بامشقت کی سزا سنانے والے سی بی آئی جج جگدیپ سنگھ کو حکومت نے زیڈ پلس سیکیورٹی فراہم کرتے ہوئے ان کے خاندان کو بھی فول پروف دینے کے احکامات جاری کردیئے ہیں۔
”این ڈی ٹی وی “ کے مطابق ڈیرا سچا سودا کے سربراہ گرمیت رام رہیم کو سزا سنانے والے سی بی آئی کے جج جگدیپ سنگھ کو زیڈ پلس زمرہ کی سیکیورٹی دی گئی ہے،زیڈ پلس سیکیورٹی کے تحت ان کے ساتھ ہمہ وقت این ایس جی کے 10 کمانڈوز کے ساتھ ہی کل 55 پولیس اہلکار موجود رہیں گے۔جگدیپ سنگھ کے گھر اور اہل خانہ کو بھی فول پروف سیکیورٹی دینے کے احکامات جاری کئے گئے ہیں ، رام رہیم کو سزا سنانے کے بعد جج جگدیپ سنگھ پر جان لیوا حملوں کے خدشات کے پیش نظر انہیں یہ سیکیورٹی دی گئی ہے۔واضح رہے کہ سی بی آئی کے جج جگدیپ سنگھ نے ریپ گرو بابا کو دو خواتین سادھوو¿ں کے ساتھ ریپ کا مجرم قرار دیتے ہوئے گذشتہ روز روہتک کی سناریا جیل میں 10،10 سال قید بامشقت کی سزا سنائی تھی، جس کے مطابق اسے بیس سال جیل کی سلاخوں کے پیچھے گزار نے ہوں گے، اس سے قبل پنجاب اور ہریانہ ہائی کورٹ نے جج جگدیپ سنگھ کو سیکیورٹی فراہم کرنے کے احکامات دئیے تھے۔عدالت نے عصمت دری کے اس کیس میں رام رہیم سنگھ پر 15۔15 لاکھ روپے کا جرمانہ بھی عائد کرتے ہوئے حکم دیا تھا کہ دونوں متاثرہ خواتین کو معاوضہ کے طور پر 14، 14 لاکھ روپے ہرجانہ بھی ادا کیا جائے۔
ہم آپ کو بتادیں کہ گذشتہ سال جگدیپ سنگھ سی بی آئی کے خصوصی جج تھے. سال 2012 میں وہ ہریانہ جسٹس سروسز میں شامل ہو ئے، ان کی پہلی تقرری سونی پت میں تھی.دوسری طرف یہ بات قابل ذکر ہے کہ ہائی کورٹ انتظامیہ کی مختلف قسم کی انکوائریوں کے بعد انہیں سی بی آئی عدالت میں بطور جج تقرری کی گئی ،اس لئے کہا جاتا ہے کہ یہ جگدیپ سنگھ کی دوسری تقرری ہے.دوسری طرف جگدیپ سنگھ کے ساتھ کام کر چکے ایک وکیل کے مطابق جگدیپ سنگھ انتہائی منکسر المزاج شخصیت کے مالک ہیں،وہ بے حد کم بولتے اور با صلاحیت ہونے کے ساتھ ساتھ ڈسپلن کے سخت پابند سمجھے جاتے ہیں، اس وقت پورا ہندوستان جگدیپ سنگھ کی جرات ،شجاعت اور ایمانداری کوسلام کررہاہے ،ہر بچہ کی زبان جگدیپ سنگھ کا نام ہے ۔
