گوا (ملت ٹائمز)
گواکے وزیراعلی اور سابق مرکزی وزیرمنوہر پاریکر کا اتوار کی شام طویل علالت کے بعد انتقال ہوگیا، وہ 63 سال کے تھے۔ صدر جمہوریہ رام ناتھ کووند نے انکے انتقال پر اظہار تعزیت کیا ہے۔
منوہر پاریکر ستمبر کے مہینے میں امریکہ سے علاج کراکر ہندوستان لوٹے تھے۔ امریکہ میں ایک ہفتہ تک ان کا علاج چلا تھا۔ اس سے قبل ایک مرتبہ اور وہ علاج کے لئے تین مہینے تک امریکہ میں رہے تھے۔ امریکہ سے لوٹنے کے بعد بھی پچھلے سال اکتوبر میں ان کی طبیعت پھر خراب ہو گئی جس کے وجہ سے انہیں دہلی کے ایمس میں داخل کرایا گیا تھا۔ ایک مہینہ ایمس میں داخل رہنے کے بعد انہیں ایئر ایمبولنس کے ذریعہ گوا لے جایا گیا تھا۔ گوا میں انہیں آئی سی میں داخل کرانا پڑا تھا۔
صدر جمہوریہ کووندنے اپنے تعزیتی پیغام میں کہا ”طویل علالت کے بعد گوا کے وزیراعلی منوہر پاریکر کے انتقال کی خبر سن کر کافی دکھ ہوا۔ عوامی زندگی میں انکی ہمت ،لگن اور گوا کے وزیراعلی اور ملک کے وزیر دفاع کی حیثیت سے انکی خدمات کو ملک ہمیشہ یاد رکھے گا۔“
منوہر پاریکر فروری 2018 سے پینکریاز کے کینسر میں مبتلا تھے۔ وہ چار مرتبہ گوا کے وزیر اعلیٰ رہے۔ طویل مدت تک کینسر میں مبتلا رہنے کے بعد پاریکر نے عالمی یوم کینسر کے موقع پر کہا تھا کہ انسانی دماغ کسی بھی بیماری پر جیت حاصل کر سکتا ہے۔
ان کے انتقال پر تعزیت کا اظہار کرنے والوں کا تانتا لگا ہوا ہے۔ صدر جمہوریہ رام ناتھ کووند ، وزیر اعظم نریندر مودی ، کانگریس صدر راہل گاندھی ، یو ڈی ایف کے صدر مولانا بد رالدین اجمل ، وزیر خزانہ ارون جیٹلی سمیت متعدد لیڈروں نے تعزیت کا اظہار کیا ہے ۔
