نئی دہلی ۔یروشلم(ملت ٹائمز)
ہندوستان اور اسرائیل نے دہشت گردی کے خلاف مشترکہ جدوجہد پر اتفاق کرتے ہوئے خلائی تحقیق،پانی اور زرعی ٹیکنالوجی سمیت مختلف شعبوں میں باہمی تعاون بڑھانے کے 7معاہدوں پر دستخط کر لئے ہیں ،وزیر اعظم نریندر مودی اور بنجمن نیتن یاہو کے درمیان وفود کی سطح پر ہونے والے تفصیلی مذاکرات کے بعد ایم او یو پر سائن کئے گئے ،مودی کی اسرائیلی وزیر اعظم کو دورہ ہند کی دعوت،نیتن یاہو کا مودی کی تعریف کرتے ہوئے کہنا تھا کہ” ہماری جوڑی جنت میں بنی ہے“۔
”این ڈی ٹی وی “ کے مطا بق ہندوستان اور اسرائیل کے درمیان ہونے والے معاہدوں میں ”اسرو“ اور اسرائیلی خلائی ایجنسی کے درمیان ہونے والے معاہدے کا کافی اہم سمجھا جا رہا ہے۔نریندرا مودی کے دورہ اسرائیل کے دوسرے روز وزیر اعظم اور بنجمن نیتن یاہو کے درمیان دنوں ملکوں کے وفود کی سطح پر تفصیلی مذاکرات ہوئے جس کے بعد دونوں ملکوں کے وزرائے اعظم نے خلائی تحقیق،پانی اور زرعی ٹیکنالوجی سمیت مختلف شعبوں میں باہمی تعاون بڑھانے کے 7معاہدوں پر دستخط کئے، دونوں ممالک کے درمیان زراعت کے شعبہ میں بھی اہم معاہدے ہوئے،مذاکرات کے بعد مشترکہ پریس کانفرنس سے خطاب کرتے ہوئے ہندوستانی وزیر اعظم نریندرا مودی نے کہاکہ نیتن یاہو کے ساتھ بات چیت میں دہشت گردی کی روک تھام اور اپنے ا سٹریٹجک مفادات کے تحفظ کے لئے ساتھ مل کر مزید تفصیل سے کام کرنے پر بھی اتفاق کیا گیا ہے، ترقی کے بارے میں دونوں ممالک کے خیالات ایک جیسے ہیں اور انہی یکساں خیالات نے ہماری دوستی کو مزید مضبوط بنایا ہے۔ ساتھ ہی ساتھ مودی نے اسرائیلی ٹیکنالوجی کی بھی تعریف کرتے ہوئے کہا کہ ٹیکنالوجی کے میدان میں اسرائیل دنیا میں کافی آگے ہے،ہمارا خیال ہے کہ ساتھ مل کر ہمارے سائنس دان اور محقق خطے میں باہمی فائدے کے حل اور تعمیر و ترقی کے نفاذ کے لئے مل کر بہتر کام کر سکتے ہیں۔ وزیر اعظم نریندر مودی نے اپنے شاندار استقبال پر اسرائیلی وزیر اعظم کا شکریہ ادا کرتے ہوئے کہاکہ نیتن یاہو کی باتوں نے مجھے کافی متاثر کیا ہے، میں نیتن یاہو کے خاندان سے بھی ملاہوں جس کی مجھے بڑی خوشی ہے،ہم دوطرفہ تجارت اور سرمایہ کاری کے ذریعے دونوں ملکوں کے درمیان مضبوط شراکت داری کی بنیاد رکھ سکتے ہیں۔اس موقع پر نریندرا مودی نے اسرائیلی وزیر اعظم کو دورہ بھارت کی دعوت بھی دی۔اسرائیلی وزیر اعظم نیتن یاہو نے بھی پریس کانفرنس میں نریندرا مودی کی تعریف کرتے ہوئے کہا کہ ہماری جوڑی جنت میں بنی ہے۔
قبل ازیں ہندوستانی وزیر اعظم نریندرا مودی نے اپنے اسرائیل کے دورے کے دوسرے دن اسرائیل کے صدر رولن سے ملاقات کی۔ مودی کا خیر مقدم کرتے ہوئے رولن نے کہا کہ ہمیں بھارتی وزیر اعظم مودی کا اپنے مہمان کے طور پر خیر مقدم کرتے ہوئے خوشی ہو رہی ہے، ہندوستان اور اسرائیل ایک اچھے ساتھی ثابت ہوں گے اور مختلف علاقوں میں ان کا باہمی تعاون مزید گہراہوگا۔
