نئی دہلی۔8دسمبر
نائب صدر جمہوریہ وینکیا نائیڈو نے وندے ماترم کہنے پر اعتراض کرنے والوں کو لے کر بڑا بیان دیا ہے۔ انہوں نے کہا ہے کہ اگر وہ لوگ ماں کو سلام نہیں کریں گے تو کیا افضل گرو کو سلام کریں گے ؟۔ نائیڈو کا سوالیہ انداز میں کہنا تھا کہ وندے ماترم کا معنی ہے ماں تجھے سلام ، کیا مشکل ہے ؟۔ اگر ماں کو سلام نہیں کریں گے تو کیا افضل گرو کو سلام کریں گے۔
نیوز 18 اردو کے مطابق نائب صدر وینکیا نائیڈو وشو ہندو پریشد کے سابق صدر اشوک سنگھل کی کتاب کے اجرا کے موقع پر منعقدہ ایک پروگرم میں بول رہے تھے۔ انہوں نے نیشنلزم کی تعریف کرنے والے لوگوں کا تذکرہ کرتے ہوئے کہا کہ وندے ماترم کا مطلب ماں کی تعریف کرنا ہوتا ہے۔ انہوں نے کہا کہ بھارت ماتا کی جے وہ صرف کسی تصویر میں کسی دیوی کے بارے میں نہیں ہے۔
نائیڈو نے سپریم کورٹ کے 1995 کے فیصلہ کا تذکرہ کرتے ہوئے کہا کہ مذہب صرف زندگی گزارنے کا ایک طریقہ ہے۔ انہوں نے کہا کہ اس ملک میں رہ رہے 125 کروڑ ان کی ذات ، رنگ ، علاقہ یا مذہب کچھ بھی ہو ، وہ سبھی ہندوستانی ہیں۔
