مولانا نور عالم خلیل امینی دارالعلوم دیوبند سے شائع ہونے والی عربی میگزین ماہنامہ الداعی کے چیف ایڈیٹر ہیں۔بلامبالغہ یہ میگزین ہندوستان سے عربی زبان میں شائع ہونے والے مجلات میں پہلے نمبر پر ہے اورعرب ممالک میں اسی خصوصی پذیرائی حاصل ہے
نئی دہلی (ملت ٹائمز)
عربی زبان وادب میں نمایاں خدمات انجام دینے کے حوالے سے صدرجمہوریہ ایوارڈ برائے سال 2017 کیلئے معروف ادیب اور دارالعلوم دیوبند کے موقر استاذ مولانا نور عالم خلیل امینی کے نام کا اعلان کیاگیاہے ۔مولانا نور عالم خلیل امینی دارالعلوم دیوبند سے شائع ہونے والی عربی میگزین ماہنامہ الداعی کے چیف ایڈیٹر ہیں۔بلامبالغہ یہ میگزین ہندوستان سے عربی زبان میں شائع ہونے والے مجلات میں پہلے نمبر پر ہے اورعرب ممالک میں اسی خصوصی پذیرائی حاصل ہے ۔عالم عرب اور فلسطین کے حالات پر مولانا امینی کا گہرا مطالعہ بھی ہے اورمتعدد کتابیں ان کے قلم سے عربی اور اردو میں منظر عام پر آچکی ہیں جس میں فلسطین صلاح الدین ایوبی کے انتظار میں۔صلیبی صہیونی جنگ۔ کیا اسلام پسپا ہورہاہے؟ کو اہل علم کے درمیان خصوصی مقبولیت حاصل ہے اس کے علاوہ وہ کوہ کن کی باتیں اور پس مرگ زندہ بھی آپ کی مقبول ترین تصانیف میں شامل ہیں ۔
ملت ٹائمزکے ذرائع کے مطابق صدر جمہوریہ ایوارڈ سال 2017 کیلئے مولانا نور عالم خلیل امینی ۔دہلی یونیورسیٹی کے پروفیسر ڈاکٹر محمد نعمان خان اور پروفیسر محمد مسعود کے نام کا اعلان ہوا ہے ۔جبکہ صدر جمہوریہ ایوارڈ سال 2018 کیلئے پروفیسر محمد بدیع الرحمن ۔پروفیسر این اے عبد القدیر ۔پروفیسر غلام یحی انجم ۔ ڈاکٹر علی کے نوفل کے نام کا اعلان ہواہے ۔
واضح رہے کہ 1996 سے سنسکرت ،عربی ،فارسی اور دیگرکئی زبانوں میں نمایاں خدمات انجام دینی والی شخصیات کے نام کا ہر سال 15 اگست کو اس ایوارڈ کیلئے اعلان کیا جاتاہے اور صد رجمہوریہ کے ہاتھوں انہیں شال ،ایوارڈ ،سرٹیفیکٹ اور 50000 روپے دیئے جاتے ہیں ۔پی آئی بی نے بھی اپنی ویب سائٹ پر ان تمام ناموں کی تصدیق کردی ہے ۔مولانا نور عالم خلیل امینی کو بدریان سمان سے بھی نواز جائے گا۔
