غزہنئی دہلی۔8دسمبر(ملت ٹائمز)
امریکی صدر ڈونلڈ ٹرمپ کی جانب سے مقبوضہ بیت المقدس شہر کو صہیونی ریاست کا دارالحکومت قرار دیے جانے کے خلاف پوری مسلم امہ سراپا احتجاج ہے۔ آج جمعہ کو نماز جمعہ کے اجتماعات سے پہلے اور بعد میں مشرق سے مغرب اور شمال سے جنوب تک پھیلے مسلمان ملکوں اور دوسرے ممالک میں بسنے والے مسلمانوں اور غیرمسلم بھائیوں نے بھی فلسطینی قوم کے ساتھ اظہار یکجہتی کے لیے مظاہرے کیے۔
مرکزاطلاعات فلسطین کے مطابق جمعہ کے روز فلسطین، ترکی، ملائیشیا، اردن، ایران، مصر، پاکستان، انڈونیشیا، یمن، تیونس، بحرین، صومالیہ، بنگلہ دیش، مراکش، یورپی ممالک اور کئی دوسرے ملکوں میں فلسطینی پرچم اٹھا کر لاکھوں افراد نے القدس کی حمایت اور ٹرمپ کے اعلان کے خلاف جلوس نکالے۔
نماز جمعہ کے اجتماعات کے بعد عرب اورمسلمان ممالک میں مظاہروں میں شرکاء نے امریکی صدر ٹرمپ کے پتلے اور تصاویر بھی نذرآتش کیں۔
جمعہ کے روز پوری دنیا میں فلسطینیوں کے ساتھ اظہار یکجہتی کے لیے 521 مظاہرے کیے گئے۔ ان میں ترکی میں 132 مقامات پر فلسطینیوں کے ساتھ اظہار یکجہتی کے لیے مظاہرے ہوئے۔ اس کے علاوہ امریکی ریاستوں میں 91 مقامات پر احتجاج کیاگیا۔ یورپی ملکوں میں جرمنی، فرانس اور دیگر ممالک میں فلسطینیوں اور القدس کی نصرت کے لیے جلوس نکالے گئے۔ترکی کے دارالحکومت استنبول میں سب سے بڑا احتجاجی مظاہرہ مسجد سلطان محمد فاتح کے باہر نکالا گیا۔ اس کے علاوہ ترکی کے کئی شہروں میں القدس کے ساتھ اظہار یکجہتی کے لیے جلوس نکالے گئے۔
مسلمان ممالک میں ہونے والے احتجاجی مظاہروں سے خطاب کرتے ہوئے مقررین نے امریکی صدر ڈونلڈ ٹرمپ کے القدس کے بارے میں اعلان کو مسلمانوں کے خلاف اعلان جنگ قرار دیا۔ مقررین نے امریکا اور اسرائیل کے خلاف جہاد شروع کرنے اور فلسطینیوں کو ا?زادی کے حصول کے لیے ہرممکن مدد فراہم کرنے پر زور دیا۔
ملائیشیا میں سب سے بڑا جلوس کولالمپور میں نکالا گیا۔ مظاہرین نے ہاتھوں میں فلسطینی پرچم، ٹرمپ کی تصاویر اور القدس کی حمایت پر مبنی نعروں پر مشتمل بینرز اور کتبے اٹھا رکھے تھے۔ احتجاجی مظاہروں میں ملائیشیا کے وزراءاور حکمراں جماعت کے سینیر رہ نما بھی شریک تھے۔
اردن، پاکستان، بنگلہ دیش، مصر، لبنان، ایران اور دوسرے مسلمان ممالک میں ہونے والے مظاہروں میں شرکاء نے امریکی صدر کے القدس کے بارے میں اقدام کو مسترد کردیا۔
پاکستان کے متعدد شہروں میں نصرت القدس جلوس اور ریلیاں نکالی گئیں۔ امریکی صدر کے القدس کے حوالے سے اعلان کے خلاف پاکستان کے شہروں کراچی، لاہور، پشاور، اسلام،آباد،راولپنڈی میں احتجاجی مظاہرے کئےگئے۔ پاکستان میں جماعت اسلامی اور دیگر مذہبی اور سیاسی جماعتوں کی اپیل پر ہزاروں افراد نے فلسطینیوں اور القدس کی حمایت میں شرکت کی۔ مظاہرین سے خطاب کرتے ہوئے قائدین کو اور اسرائیل اس کے پٹھو امریکا کو کڑی تنقید کا نشانہ بنایا۔
قابل افسوس بات یہ ہے کہ ہندوستان ان ملکوں میں شامل ہے جہاں مسلمان انڈونیشا کے بعد سب سے زیادہ پائے جاتے ہیں،مسلمانوں کی متعدد بڑی بڑی ملی وسماجی تنظیمیں ہیں لیکن فلسطینیوں کے ساتھ اظہار یکجہتی کیلئے جہاںدنیابھر میں آج مظاہر ے کا اہتمام کیا گیاہندوستان میں اس پر ذرہ برابر بھی کوئی توجہ نہیں دی گئی ۔ جمعیة علماءہند ،آل انڈیا مسلم مجلس مشاروت ،آل انڈیا ملی کونسل ،مرکزی جمعیة اہل حدیث ،جماعت اسلامی ہند ،رضااکیڈمی سمیت کسی بھی تنظیم کی جانب سے کوئی احتجاجی مظاہر ہ نہیں کیا گیا ۔البتہ ان تنظیموں کے سربراہان اردو اخبارات کے نام پریس ریلیز جاری کرکے ٹرمپ کے اقدام کی سخت مذمت ضروری کی ہے ۔
