انڈونیشیا کے جزیرے جاوا میں زلزلے کے شدید جھٹکوں کے باعث تیرہ سو سے زائد عمارتیں منہدم ہو گئی ہیں جبکہ آٹھ افراد ملبے تلے دب کر ہلاک ہوگئے ہیں۔ امریکی جیولوجیکل سروے کے مطابق ہفتے اور اتوار کی درمیانی شب آنے والے اس زلزلے کی شدت چھ تھی۔ مقامی امدادی حکام نے ہلاکتوں میں اضافے کا خدشہ ظاہر کیا ہے۔ انڈونیشیا میں رواں ہفتے آنے والی یہ دوسری آفت تھی۔ چند روز پہلے آنے والے سمندری طوفان کی وجہ سے کم ازکم 174 افراد مارے گئے تھے جبکہ اڑتالیس ابھی تک لاپتہ ہیں۔
